Dúisenbi Japoniianyń soltústiginde qalyń qar jaýyp, áýe jáne temirjol qozǵalysy toqtady, dep habarlaidy QazAqparat Kyodo agenttigine silteme jasap.
Tańǵy 9:30-daǵy jaǵdai boiynsha, Hokkaido aralyndaǵy Titose áýejaiynda 140-qa jýyq reis keiinge shegerildi. Hokkaido Railway Co. kompaniiasy JR Sapporo stantsiiasyna baryp-qaitatyn barlyq poiyzdardyń qozǵalysyn toqtatty.
Tańǵy 10:50-degi jaǵdai boiynsha, Sapporo men Hokkaidonyń basqa da aýdandarynda 970-ten astam poiyz reisi alynyp tastaldy. Bul óńirde kúnine 1 230 reis jasalynady. Iaǵni, óńirdegi reisterdiń 70%-y toqtatylǵan.
Japoniianyń meteorologiialyq agenttiginiń derekterine sáikes, Hokkaido astanasynda bir táýlik ishinde dúisenbi kúni tańǵy saǵat 6-ǵa deiin 11 sm qar túsken.
Hokýtodaǵy Hakodate-Esasi tasjolynda birneshe avtokóliktiń qatysýymen jol-kólik oqiǵasy bolǵan, saldarynan jeti adam aýrýhanaǵa jetkizildi. Jergilikti qutqarýshylardyń málimdeýinshe, olardyń bireýi qaitys bolǵan.
Jergilikti politsiianyń habarlaýynsha, Tobetsýda jeti kólik soqtyǵysyp, eki er adam jeńil jaraqattar alǵan. Kólikter qatarynda avtotsisterna bolǵan.
Agenttiktiń derekterine qaraǵanda, Hokkaido men Tohokýda ekpini 126 saǵ/km jel kútiledi. Sonymen qatar Hokkaido, Tohoký jáne Hokýriký óńirlerinde muhit tolqyndarynyń biiktigi 6 metrge deiin jetpek.
