Álem halqynyń 70% latyn álipbiin biledi. Tipti japon, qytailardyń ózi «qytai latyn grafikasy», «japon latyn álippesi» degendi qoldanady. Bul týraly elordada ótken «Latyn grafikasyndaǵy BAQ múmkindigi men máseleleri» atty seminarda aityldy, dep habarlaidy QazAqparat.
QR Mádeniet jáne sport ministrligi Til saiasaty komitetiniń tapsyrysymen Shaisultan Shaiahmetov atyndaǵy «Til – qazyna» ulttyq ǵylymi-praktikalyq ortalyǵynda BAQ ókilderiniń qatysýymen latyn grafikasyna qatysty seminar ótti.
«Qazirgi ýaqytta kirillshe jazatyndar sany kóp bolǵanmen, ýaqyt óte kele latyn grafikasymen jazatyndardyń qatary kóbeie bastaidy. Kirill álipbii – slavian ulttarynyń tól jazýy, biraq Shyǵys Eýropada otyrǵan slaviandar kirill álipbiinen áldeqashan bas tartyp, latyn álipbiine kóship ketti. Kirill álipbii – óte jaqsy álipbi, óitkeni ol orta ǵasyrda paida bolǵan latyn álipbiiniń kemshiligin eskere otyryp, jetilgen. Tańbalary da ádemi, biraq qazirgi ýaqytta Kirill álipbiiniń «dáýreni júrmei tur». Kirill álipbiiniń qoldaný aiasy jyl ótken saiyn taryla beredi», - deidi «Til – qazyna» ulttyq ǵylymi-praktikalyq ortalyǵynyń ǵalym hatshysy Anar Fazyljanova.
Ol latyn álipbiiniń aiasy keńeiýi – tendentsiia ekenin aitty.
«Bul – úrdis, biz ony toqtata almaimyz. Qazaqstandaǵy qazaqtaný – tendentsiia, myń jerden kúsh, shara qoldansań da, qazaq ózin tanýdy endi toqtatpaidy. Qazaq ózin-ózi jaqsy kórýdi endi toqtatpaidy. Al endi osy qazaqtaný protsesine kirill álipbii jaýap bere ala ma? Latyn álipbiinde eshqandai teris stereotipter joq. Álemniń 70%-y latyn álipbiin biledi. Tipti japon, qytailardyń ózi qytai latyn álipbii, japon latyn grafikasy degendi qoldanady. Qytaidyń ekonomika sektorynda ieroglifter qoldanylmaidy, ekonomikaǵa qatysty qytai tilindegi sózder tek latyn álipbiimen jazylady», - deidi ol.
Sonymen qatar, atalǵan ortalyqtyń ǵalym hatshysy latyn álipbiine kóshýdiń mańyzyn ata-analarǵa durys túsindirý kerektigin aitty.
«Kirill álipbiin qoldaityn ata-ana óziniń balasyn keńeiip bara jatqan keń dúnieden sýyryp alyp, tarylyp bara jatqan tar dúniege laqtyratynyn bilmeidi. Grafikalyq keńistik adamǵa yńǵaily orta jasaidy. Latyn álipbiin bilmeitin bala diskomfortta júredi. Osyny eskerýimiz kerek», - deidi maman.
