Oqý-aǵartý ministri Ashat Aimaǵambetov óziniń Telegram kanalynda Japoniianyń bilim júiesindegi erekshelikke qatysty jariialanǵan maqalamen bólisti, dep habarlaidy "Ult aqparat".
"Bilim berýde dálelder men zertteýlerge negizdelgen sheshimder qabyldaý óte mańyzdy. Bilim berý júiesin reformalaýdaǵy Japoniianyń 30 jylǵa jýyq tájiribesinen kóp maǵlumat alýǵa bolady.
Ásirese eki dúnie erekshe áser qaldyrdy:
1. Úkimettiń qoǵamnyń úlken qysymyna jáne PİSA zertteýiniń birneshe tsiklindegi el kórsetkishteriniń tómendeýine qaramastan, bastalǵan reformalardy jalǵastyrý jáne qoǵamnyń belgili bir bóliginiń talaptaryna baǵyný arqyly popýlizmge jol bermeý kózqarasy.
2. Mektep reformasyn júzege asyrýǵa qoǵam men sarapshylardy keńinen tartý.
Reforma 20 ǵasyr indýstriiasynan 21 ǵasyr ekonomikasyna ótý qajettiligine bailanysty 1984 jyly bastaldy. Ótken ǵasyrdyń 80-shi jyldarynda ekonomikasy boiynsha ekinshi oryn alǵan Japoniia úkimeti ekonomikalyq reformalardy bastaýǵa sheshim qabyldap, ol úshin basty nazarǵa bilim berý júiesin reformalaý mindeti alynady. Bul reforma tek mektep baǵdarlamalaryn ǵana emes, sonymen birge bilim berýdi basqarý júiesin, baǵalaýdy, ulttyq testileýdi, pedagogterdiń biliktiligin arttyrýdy, qarjylandyrýdy, JOO-ǵa túsý emtihandaryn jáne t.b. júielerdi de qamtydy. Eger málimet qyzyq bolsa, tolyǵyraq siltemeden oqi alasyz.
Japoniianyń jáne basqa elderdiń tájiribesi bilim berý salasyndaǵy reformalar azamattardyń kóp bóligin qamtityn, sondai-aq júieli, úzdiksiz kózqarasty qajet etetin óte uzaq protsess ekenin kórsetedi" - dep jazdy ministr.
