Japondyq Diamond Princess laineriniń bortynda bolǵan Qazaqstannyń 4 azamaty Nur-Sultan qalasynyń №3 kópbeiindi aýrýhanasynyń janyndaǵy infektsiiaǵa qarsy korpýsqa ornalastyryldy, dep habarlaidy "Ult aqparat".
«23 aqpanda japondyq Diamond Princess laineriniń bortynda bolǵan Qazaqstan azamattary otanyna oralyp, karantinge jatqyzyldy. Eske sala keteiik, Japoniia jaǵalaýyndaǵy kriýz lainerinde álemniń 50 eliniń 3 700 azamaty oqshaýlanyp qalǵan bolatyn», - dep habarlady QR Densaýlyq saqtaý ministrliginiń taýarlar men kórsetiletin qyzmetterdiń sapasy men qaýipsizdigin baqylaý komitetinen.
Komitetten habarlanǵandai, Nur-Sultan qalasyndaǵy áýejaiǵa 23 aqpan kúni «Tokio-Nur-Sultan reisi» boiynsha 20 jolaýshy kelgen. Onyń 16-sy – Qazaqstan azamattary. Tórteýi - japondyq Diamond Princess laineriniń ishinde bolǵan jolaýshylar. Sonymen qatar jolaýshylardyń ishinde Japoniia, Liviia, Ulybritaniia, Ýkraina, Ońtústik Koreia men QHR azamattary bar.
«Kelgen azamattardyń bári de qaladan 7 shaqyrym jerdegi Nur-Sultan qalasynyń №3 kópbeiindi aýrýhanasynyń janyndaǵy infektsiiaǵa qarsy korpýsqa jaiǵasty. Dál osy aýrýhanada budan buryn Ýhannan kelgen stýdentter oqshaýlanǵan edi. Kelgen azamattardan koronavirýs infektsiiasy boiynsha analiz úshin synama alyndy. Báriniń jaǵdaiy qanaǵattanarlyq. Olar 14 kúndik karantinde bolady», - dep habarlaidy komitetten.
Densaýlyq saqtaý ministrligine qarasty komitet qazirgi tańda Qazaqstanda koronavirýs infektsiiasyn juqtyrǵan adamnyń joqtyǵyn habarlaidy. Qosymsha aqparat qajet bolǵan jaǵdaida táýlik boiy qyzmet etetin 1406 bailanys ortalyǵyna habarlasýǵa bolady.
