Japoniia jeksenbi kúngi taifýnnan aman qalǵandardy qutqarý jumysyn bastady. Óte kóp mólsherde jaýǵan jaýyn-shashyn saldarynan turǵyn úilerdiń iri ýchaskelerin sý shaiyp ketti, dep habarlaidy kyodonews.
Ózin-ózi qorǵaý kúshterinen 27 myńǵa jýyq áskeri qyzmetker Chimkýma ózeniniń jaǵalaýy opyrylǵannan keiin qiyn jaǵdaida qalǵan 360 adamdy qutqarý úshin osy óńirlerge, sonyń ishinde Noganoǵa jiberildi.
Nagano stansasynyń janyndaǵy Shyǵys Japoniia temirjol kompaniiasynyń temirjol stansasynda turaqqa qoiylǵan on qatar júrdek jolaýshylar poiyzdaryn, esepsiz nysandar men turǵyn úilerdi tasqyn sý alyp ketti.
Qutqarýshylar sý basqan úilerdegi turǵyndardy qutqarý úshin tikushaq pen qaiyqtardy paidalandy.
Japoniianyń basty araly Honsiýde 6 millionnan astam adamǵa evakýatsiia jasaýǵa keńes berilgen. Poiyz operatorlary temirjol qatynasyna shekteý qoiǵan, al astanalyq jáne oǵan jaqyn aýdandardyń áýejailary áli de jabyq tur.
Japon meteorologiialyq agenttigi Tokio, Gýnma, Saitama, Kanagava, Iamanasi, Nagano, Sidzýoka, Niigita, Fýkýsima, Tochigi, Ibaraki, Miiagi jáne Ivate prefektýralary úshin birden beske deiingi shkala boiynsha eń joǵary qaýip deńgeiin jariialady.
Buǵan deiin habarlanǵandai, 12 ekipaj múshesi bar panamalyq júk kemesi senbi kúni keshke Tokio shyǵanaǵynda qatty jel men jańbyr bolǵan jerde batyp ketken edi.
Jeksenbi kúni tańerteń 1925 tonnalyq keme ekipajynyń tórt múshesi qutqaryldy, alaida onyń beseýi artynan kóz jumdy. Batyp ketken kemeniń úsh múshesi iz-túzsiz joǵalǵan.
