Beisenbi kúni Japoniianyń basty araly Honsiý ortalyǵyndaǵy Isesaki qalasynda jaýlasqan iakýdza gangsterler toby arasynda atys boldy, dep habarlaidy Kyodo agenttigi.
Oqiǵa ornynan eldegi eń iri qylmystyq sindikat qurylymy «Iamagýti-gými»-diń keýdeden jáne basynan jaraqat alǵan músheleri tabyldy.
Taǵy bir adamdy kólikpen qaǵyp ketken, onyń jaǵdaiy aýyr. Politsiia jaralanǵan úsh adamdy gospitalge jetkizdi. Qaqtyǵys ornynan qannyń izderi, tastalǵan aiaq-kiim, kiimniń jyrtylǵan bóligi jáne kólikterdiń synǵan bólshekteri tabyldy.
Politsiia oqiǵa ornynan izin sýytqandardy izdestirip jatyr.
Japoniiada uiymdasqan qylmystyq toptar sany 2019 jyly 2,3 myń adamǵa azaiyp, qazir 28,2 myńy ǵana qaldy. Politsiia ókilderiniń aitýynsha, iakýdza sanynyń qysqarýyna uiymdasqan qylmysqa degen qysym men qarjy tabýdyń qiyndyǵy sebep bolǵan.
«Iamagýti-gými» ázirge Japoniiadaǵy iri iakýdza toby, ol shaǵyn bandalardyń basym bóligin biriktiredi. Onyń quramynda shamamen 8,9 myń adam bar. Ekinshi orynda 2015 jyly osy sindikattan bólinip shyqqan «Kobe Iamagýti-gými» toby tur, onyń quramynda 3 myńǵa jýyq iakýdza bar. Eki sindikat arasynda jaýlastyq áli kúnge deiin saqtalyp keledi.
