Japoniia koronavirýsqa bailanysty taǵy úsh prefektýra – Hokkaido, Okaiama jáne Hirosimada tótenshe jaǵdai jariialady. Úkimet odan bólek, taǵy úsh prefektýrada (Gýmmý, Isikavý jáne Kýmamoto) shekteý sharalaryn kúsheitýdi kózdep otyr.
Tokio, Osaka jáne taǵy tórt aýmaqta tótenshe jaǵdai jariialanyp qoiǵan: ereje boiynsha meiramhanalar ishimdik satpaýy tiis, 20.00-ge deiin jumysyn toqtatýy qajet. Jarystar men kontsertterge bes myń adamnan artyq adam qatysa almaidy.
Sońǵy aptalarda elde virýs kúsheigen. Indet bastalǵaly beri munda 667 myńnan astam adamnan koronavirýs anyqtalǵan, 11,2 myń adam qaitys bolǵan.
Indet órshigen shaqta Iosihide Sýga úkimeti Olimpiada oiyndaryna daiyndyqty bastap ta ketti. Byltyr Olimpiada pandemiiaǵa bailanysty keiinge shegerilgen bolatyn. Alaida qazir elde barǵan saiyn Olimpiada ótkizýge qarsylar qarasy kóbeiip jatyr. Olimpiada oiyndaryn ótkizbeý týraly petitsiiaǵa 9 kún ishinde 350 myń adam qol qoiǵan. Reuters agenttiginiń habarlaýynsha, "Tokio Olimpiada oiyndaryn toqtatý" týraly kampaniianyń uiymdastyrýshysy Kendji Ýtsýnomiia Japoniia sportshylar men jankúierlerdi shyn máninde qarsy alýǵa daiyn bolǵan kezde ǵana halyqaralyq jarys ótýi tiis degen.
"Biz jarys ótkizetindei jaǵdaida emespiz, sol sebepti Olimpiada oiyndary shegerilýi tiis. Óitpesek, meditsinalyq resýrstardy Olimpiadaǵa jumsaýǵa tiis bolamyz" dedi ol baspasóz jiyny kezinde.
Uiymdastyrýshylar petitsiiany Olimpiada jáne Paralimpiada komitetiniń jetekshilerine, Tokio gýbernatory Iýriko Koikege joldaǵan.
Al Olimpiadaǵa qarsy kampaniia jaily suraqtarǵa jaýap bergen Tokio gýbernatory Koike Olimpiada qaýipsiz ári senimdi atmosferada ótý úshin ári qarai da kúsh sala beretinin aitqan.
"Ǵalamdyq pandemiiaǵa qaramastan Tokio-2020 oiyndary qaýipsiz ári senimdi bolýy kerek" dedi ol baspasóz jiyny kezinde.
Elde Olimpiada marafony ótýi tiis keibir aýdandarda atap aitqanda, Hokkaidoda tótenshe jaǵdai jariialanǵan.
Petitsiiany dárigerler, halyqaralyq dárejede tanymal sportshylar mysaly, golf chempiony Hideki Matsýiama jáne áielder arasynda úzdik tennisshi atanǵan Naomi Osaka, ataqty kásipker Masaeshi Son da qoldaǵan.
Sportshylardy qabyldaýy tiis bolǵan ondaǵan qala aýrýhanalar tolyp ketkendikten meditsinalyq kómekpen qamtamasyz etýge kepildik bere almaitynyn málimdegen.
Degenmen úkimet Olimpiada oiyndarynan bas tartpaýǵa bekingen. Japoniia óz sportshylaryn vaktsinamen qorǵaýǵa tyrysyp jatyr. Maýsym aiyna deiin barlyq sportshyǵa ekpe salynyp bitedi dep aitylady.
Buǵan deiin Pfizer/BioNTech kompaniialary Tokio Olimpiadasyna qatysatyndarǵa tegin vaktsina beretinin habarlaǵan.
Tokio olimpiadasy 2020 jyly jazda ótýi tiis edi, biraq pandemiiaǵa bailanysty biylǵa shegerilgen. Biyl Olimpiada – 23 shilde men 8 tamyz aralyǵynda, Paralimpiada 24 tamyz ben 5 qyrkúiek aralyǵynda ótýi tiis.
