Japoniiada qaita qalpyna keltirý isteri jónindegi ministr Masahiro Imamýra sózden súringeni úshin otstavkaǵa ketý týraly ótinish bildirdi, - dep habarlaidy RIA Novosti.
Seisenbide bankette sóz sóilegen ministr 2011 jyly tsýnamiden zardap shekkenderge qatysty ekiushty pikir bildirgen. Ol 2011 jyly bolǵan apat saldarynyń somasy 25 trillion ien (shamamen 227 milliard dollar) ekenin aityp, bylai dep qostady: "munyń Tohokýda bolǵany jaqsy (Honsiý aralynyń soltústigindegi aýdan, osy aýdan eń qatty zardap shekken bolatyn - Avt.), sebebi astanaǵa jaqyn mańda bolsa, shyǵyn kólemi budan da kóp bolar edi".
Qoǵamda bul sózder 20 myńǵa jýyq adam qaza tapqan perfektýralarǵa qurmetsizdik retinde baǵalandy. Japoniianyń premer-ministri Sindzo Abe Imamýranyń osy sózi úshin keshirim surady.
Sheneýniktiń daý týǵyzǵan sózderi munymen bitpeidi eken. Imamýra úsh apta buryn "Fýkýsima-1" AES-inde bolǵan apattan Fýkýsima perfektýrasynyń turǵyndarynyń óz úiine qaitýdy "jeke bastarynyń isi" dep málimdep, basy daýǵa qalǵan eken. Onyń ústine baspasóz máslihaty aiaqtalǵan kezde ol osy suraqty qoiǵan jýrnaliske "bul jerge eshqashan kelmeýdi" jáne "aýyzdy jabýdy" buiyrǵan. Sol ýaqytta premer-ministr Abe ministrdi qorǵap qalǵan edi. Al endigi daý-damaidan keiin Masahiro Imamýranyń otstavkaǵasy qabyldanypty.
