Japoniianyń Hokkaido aralynda Qazaqstan astanasynyń qurmetine «Nur-Sultan» dep atalatyn órik aǵashynyń jańa surpy gúldedi. Jańa surypty Hokkaido prefektýrasynyń Orman sharýashylyǵy ǵylymi-zertteý institýty shyǵardy, dep habarlaidy "Ult aqparat" QR SIM baspasóz qyzmetine silteme jasap.
«Nur-Sultan» sakýrasynyń ereksheligi minýs 40 gradýsqa deiin aiazǵa tózimdi – bul elordanyń aýa-raiyna beiimdelý úshin eń qajetti sipattamanyń biri.
Qazaqstannyń astanasyn beineleitin órik gúli qos gúldený ereksheligine bailanysty 10 appaq kúlte japyraqshadan turady, al sakýranyń basqa suryptarynda ádette 5 japyraqsha ǵana bar.
Sakýranyń jańa surpynyń avtory - Hokkaido prefektýrasy Orman sharýashylyǵy ǵylymi-zertteý institýtynyń doktory Ioichi Vakita.
«Meniń álemdegi sýyq aimaqtarda sakýrany ósirýmen ainalysatyn molekýliarlyq biolog retindegi maqsatym – aiazǵa tózimdi sakýranyń genetikalyq áleýetin únemi keńeitý. «Nur-Sultan» surypy ǵylymi eksperiment, sondai-aq qazaq halqyna syilyq-tilek bolyp tabylady. Gúldep turǵan sakýrany tamashalaý japon halqynyń negizgi mádeni kody jáne býddistik senimderdiń negizinde sakýra gúlderi tabiǵattyń shyǵarmashylyq kúshin jáne kóktemniń kelýin bildiredi. Osylaisha, men Qazaqstanǵa koronavirýstyq infektsiianyń taralýyn toqtatyp, daǵdarystan tez arada shyǵýdy tileimin», - deidi Ioichi Vakita.
Aiazǵa tózimdi «Chishimazakýra» sakýrasynyń túri Japoniianyń eń soltústik aimaǵy – Hokkaido prefektýrasynda ósedi jáne Orman sharýashylyǵy ǵylymi-zertteý institýty biotehnologiialardy qoldaný arqyly órik aǵashynyń osy túrin suryptaýmen ainalysady.
Tanymal japon sáýletshisi jáne Nur-Sultan qalasy bas josparyn ázirleýshi Kisio Kýrokavanyń uly Mikio Kýrokavanyń aitýynsha, onyń ákesi QR Tuńǵysh Prezidenti Nursultan Nazarbaevtyń erekshe senimine arqa súiei otyryp Qazaqstan astanasynyń bas josparyn ázirleý kezinde óziniń metabolizm men simbioz arhitektýralyq baǵytynyń tujyrymdamasyn iske asyrdy. Arhitektordyń negizgi ideiasy «simbiotikalyq sáýlet» printsipi boiynsha qalalyq jáne tabiǵi ortany úilestirý boldy.
«Japon ǵalymdary ázirlegen Nur-Sultan atty sakýranyń jańa surpy bizdiń elderdi biriktiretin taǵy bir faktor bolatynyna senimdimin», - dedi M.Kýrokava.
Sakýra dep ataityn órik aǵashy Japoniianyń ulttyq brendi. Hanami nemese gúldeý kezinde sakýrany tamashalaý dástúri jyl saiyn elge milliondaǵan týristerdi tartady. Bul artyqshylyqty Germaniia, Frantsiia jáne AQSh siiaqty jaily klimaty bar óńirlerde ornalasqan elder sheteldik týristerdi tartý úshin paidalanýda.
Japoniiada hanami kezeńi ystyq Okinavada aqpan aiynan bastalyp, aiazdy Hokkaidoda mamyrǵa deiin sozylady. Sakýra gúlderiniń «tolqyny» birtindep eldiń ońtústiginen soltústigine taralady. Japon araldarynyń paida bolýynan bastap ósip kele jatqan elde 10-ǵa jýyq jabaiy sakýranyń túri bar. Japondyqtar úshin sakýrany tamashalaityn eń yńǵaily oryn – Shindziýký ulttyq parki, onda 300-den astam sakýranyń surpy otyrǵyzylǵan.
