Japoniiada koronavirýsty juqtyrýdyń jańa oqiǵalarynyń sany azaiýyna qaramastan, karantin rejimi 31 mamyrǵa deiin uzartylady. Bul týraly Kyodo agenttigi habarlaidy.
Agenttik málimetinshe, Japoniia premer-ministri Sindzo Abe tótenshe jaǵdai rejimin uzartý týraly sheshimdi resmi túrde búgin qabyldaidy.
Elde meditsinalyq kadrlar tapshy, al ekonomikalyq belsendilik tómendei túsken.
«Ótken aptada S.Abe karantinniń uzartylýyna qatysty sóz qozǵap, adamdardyń qalypty ómirge birden oralmaitynyn qosyp ótti.
Juma kúni úkimettik top COVID-19-dyń jańa oqiǵalarynyń kóbeiýine jol bermeý úshin tótenshe sharalardy uzartýdy keńes etti.
Japoniianyń túrli prefektýralarynda koronavirýsqa shaldyǵý faktileriniń sany ártúrli bolǵandyqtan, úkimettiń infektsiia az taralǵan prefektýralarda karantin rejimin álsiretý sheshimin qabyldaityny kútilýde», - delingen aqparatta.
Osy arada, elde saiabaq, kitaphana jáne murajailardyń jumysyna sanitarlyq talaptardy qatań túrde saqtaý shartymen ǵana ruqsat etilmek. 7 sáýirde premer-ministr S.Abe qalalyq aýdandar – Tokio, Osaka jáne Fýkýokany qamtityn jeti prefektýrada tótenshe jaǵdai jariialady. Keiinirek,16 sáýirde, TJ rejimi búkil el boiynsha jariialandy.
Úkimet basshysy virýstyń el ekonomikasyna keltirgen zardabyna bailanysty Japoniianyń 126 millionǵa jýyq ár azamatyna 100 000 iennen (930 dollar) berýge ýáde etti.
Búginde Japoniiada koronavirýsqa shaldyǵýdyń 15 myńnan astam oqiǵasy tirkeldi. Qaitys boldy 550-ge jýyq naýqas.
