Japoniia úkimeti tolyq quramda ostavkaǵa ketti, dep habarlaidy QazAqparat Kyodo agenttigine silteme jasap.
Agenttiktiń dereginshe, qyrkúiek aiynyń basynda shtat basshysy Ioshihide Sýga partiia basshysy laýazymyna ózin usynbaitynyn málimdegen, bul shyn máninde onyń premer-ministr qyzmetinen ketýin bildirdi. 2012-2017 jyldary Sindzo Abe úkimetinde syrtqy ister ministri bolǵan Fýmio Kishida ótken sársenbide partiialyq sailaýda jeńiske jetti.
Dúisenbi, 4 qazanda Japoniia parlamentiniń eki palatasy da premer-ministrdiń kandidatýrasyna daýys beredi, sodan keiin ol óz ministrler kabinetin taǵaiyndaidy. Premer-ministr partiialar usynǵan kandidattardyń kópshilik daýysymen sailanady. Ádette, bul partiialardyń kóshbasshylary. Osylaisha, parlamenttegi kóp orynǵa ie partiianyń basshysy premer–ministr bolady. Iaǵni sailaýda jeńiske jetken Liberal-demokratiialyq partiiasynyń kóshbasshysy Fýmio Kishida Japoniianyń 100-shi premer-ministri atanady.
Ol dúisenbide resmi túrde ministrler kabinetin qurýǵa nietti. Ministrlikke kandidattardy irikteý demalys kúnderi aiaqtaldy. Hirokazý Matsýno úkimettiń bas hatshysy bolmaq. Burynǵy úkimetten úsh adam jańa kabinetke aýysady: syrtqy ister ministri Toshimitsý Motegi men qorǵanys ministri Nobýo Kishi óz qyzmetterin saqtap qalady, al ǵylym jáne bilim ministrligin basqarǵan Koichi Hagiýda ekonomika, saýda jáne ónerkásip ministrligin basqarady.
