Beisenbi kúni Japoniia densaýlyq saqtaý ministrligi Qytaidan kelgen er adamnyń koronavirýsqa tapsyrǵan testi oń nátije bergenin jariialady. Bul koronavirýs Japoniiada birinshi ret tirkelip otyr, dep habarlaidy QazAqparat Kyodo-ǵa silteme jasap.
Ministrliktiń málimetinshe, 30 jastaǵy er adam - Japoniianyń ońtústigindegi Kanagava prefektýrasynyń turǵyny. Ol jańa virýsty pnevmoniia órship turǵan Qytaidyń ortalyǵyndaǵy Ýhan qalasyna baryp, 6 qańtar kúni Japoniiaǵa oralǵan. Ministrlik er adamnyń ótken jumada aýrýhanaǵa jatyp, sársenbi kúni densaýlyǵy jaqsarǵan soń shyǵarylǵanyn habarlady.
Budan buryn biz zerthanalyq zertteý nátijeleri kórsetkendei, Qytaidyń Ýhan qalasyndaǵy beimálim virýsty pnevmoniianyń órshýine jańa úlgidegi koronavirýs sebep bolǵanyn habarlaǵan bolatynbyz.
Bul týraly patogenge júrgizilgen testileý nátijelerin baǵalaý tobyn basqarǵan qytailyq sarapshy Siýi Tsziango aityp berdi.
Taiaýda anyqtalǵan koronavirýs SARS (qatty asqynǵan respiratorlyq sindrom) jáne MERS (taiaýshyǵystyq respiratorlyq sindrom) atty aýrýlar týǵyzatyn belgili koronavirýs túrlerinen erekshe, dep sendirdi Qytai injeneriia akademiiasynyń akademigi Siýi.
Sarapshynyń pkirinshe, jańa virýsty ári qarai zertteý qajet.
Qytaida barlyǵy 59 adamnan virýsty pnevmoniia tabylyp, onyń ishinde jeteýi aýyr halde jatyr. 11 qańtarda Qytaida atalmysh aýrýdan qaitys bolǵan birinshi jaǵdai tirkeldi. Ońtústik Koreiada bir adamnyń juqtyrǵany málim boldy.
