Foto: instagram.com/shoko_miyata
Japoniianyń sporttyq gimnastika quramasynyń kapitany Seko Miiata Parijdegi Olimpiada oiyndaryna qatyspaityn boldy.
Ol zań men komanda erejelerin buzyp, temeki shekkeni úshin ulttyq quramadan shettetildi. Kyodo basylymynyń habarlaýynsha, 19 jastaǵy Miiata Monakodaǵy oqý-jattyǵý kezinde temeki shegip ustalǵan. Keiingi kúni ol komandanyń ashyq jattyǵýyna qatyspaǵan jáne keiinnen quramadan shettetilip, eline qaitarylǵan.
Japoniiada zań boiynsha 20 jasqa tolmaǵandarǵa alkogol ishý men temeki shegýge tyiym salynǵan. Bul zań ulttyq qurama sportshylaryna ózge elde júrgende de kúshinde bolady.
Seko Miiata 2022 jyly álem chempionatyna alǵash ret qatysyp, bórenedegi jattyǵý boiynsha qola júldeger atanǵan bolatyn. Sol jylǵy Aziia chempionatynda sekirý jáne erkin jattyǵýlar boiynsha kúmis medal, al komandalyq týrnirde qola medal ielengen edi.
