Ekologiia ministrligi «Janýarlarǵa jaýapkershilikpen qaraý týraly» zań jobasyn talqylaýǵa shaqyrady, dep habarlaidy "Ult aqparat" ministrliktiń baspasóz qyzmetine silteme jasap.
5 tamyzda, saǵat 11.00-de QR Ekologiia, geologiia jáne tabiǵi resýrstar ministrligi buǵan deiin QR Parlamenti Májilisiniń bir top depýtattary ázirlegen zań jobasyn qoǵamdyq talqylaýdy ótkizedi. Búgingi tańda bul qujat Úkimettiń qaraýynda.
«Qazaqstanda janýarlardy qorǵaý týraly jańa zań jobasynyń qajettiligi áldeqashan pisip-jetilgen. Elimizde barlyq janýarlarǵa, onyń ishinde úi, jabaiy jáne aýylsharýashylyǵy janýarlaryna jaýapkershilikpen qaraý týraly birde-bir zań joq. Janýarlarǵa qatygezdik kórsetken adamdar týraly áleýmettik jelide jii jazylady. Alaida, búginde Qazaqstandaǵy janýarlarǵa qatigezdik kórsetkeni úshin taǵaiyndalatyn jaza jeńil. Sonymen birge, tájiribe kórsetkendei, janýarlarǵa qatygezdikpen qaraý adamdarǵa qatysty qatygezdik qylmystan 5 ese, múlik qylmysynan 4 ese kóp», delingen habarlamada.
Baspasóz qyzmetiniń habarlaýynsha, qoldanystaǵy zańnamada janýarlarǵa arnalǵan baspana uǵymy jáne olardy salý standarttary, úi janýarlaryn serýendetý jáne kútip ustaý erejeleri joq. Al qańǵybas itter men mysyqtardy aýlaý jáne joiý erejeleri qalalar men eldimekenderde ártúrli.
«Dalada itterdi atýdy kópshiliktiń synǵa alýda. Janýarlardyń quqyǵyn qorǵaýshylar onyń ornyna janýarlarǵa arnalǵan baspana quryp, mysyq men itti zararsyzdandyrýdy usynady. Keibir adamdar úi janýarlaryn dalaǵa tastap, olardy uzaq ýaqyt tamaqsyz, sýsyz qaldyrady. Ýaqtyly veterinarlyq kómek kórsetpeidi jáne t.b.
Respýblikamyzdaǵy ótkiziletin itterdiń tóbelesi de etikalyq turǵyda qaita qaraýdy qajet etedi. Keibir haiýanattar baǵyndaǵy jáne tsirkterdegi janýarlardy kútip-ustaý erejeleriniń qataldyǵy azamattardyń ashý-yzasyn týdyrýda», delingen habarlamada.
Jalpy, janýarlarǵa qatigezdikpen qaraý máselesi kúrdeli. Ol balalar tárbiesimen, pedagogika, etika, aqparattyq, qorshaǵan ortany qorǵaý jáne qylmystyq-atqarý saiasatymen tyǵyz bailanysty.
«Sondyqtan búginde memleket, birinshi kezekte, haiýanattar baǵyndaǵy janýarlardy ustaýǵa qoiylatyn talaptardy qataitý, janýarlardy qorǵaýdaǵy azamattyq bastamalardy qarjylandyrý, sonymen birge zoologiialyq volonterlikti qoldaý jáne mektep oqýshylary men stýdentter arasynda janýarlarǵa jaýapkershilikpen qaraý ideiasyn ilgeriletý úshin sharalar qabyldaidy.
Óz kezeginde, Ekologiia ministrligi halyqtyń osy másele boiynsha barlyq usynystaryn qaraýǵa jáne zań jobasyn talqylaý kezinde eskerýge daiyn», delingen habarlamada.
