Blinken Taliban "bizdiń qyzmetkerlerimizge, bizdiń operatsiialarymyzǵa kedergi keltirse, biz qysqartýdy jalǵastyra bersek, oǵan tez jáne sheshýshi jaýap beriledi" dep eskertti.
Memlekettik hatshy Aýǵanstanda qalý AQSh múddesi emes ekenin atap ótti. Onyń aitýynsha, AQSh-tyń tórt ákimshiligi aýǵan úkimetiniń kúshterine milliardtaǵan dollar investitsiialaǵan. Bul olarǵa "Taliban" aldynda basymdyq bergenimen, olar shabýyldy toqtata almady.
"Biz bul kúshterdiń eldi qorǵaýǵa qabiletsiz ekenin kórdik. Bul biz kútkennen de jyldam boldy", - dedi Blinken.
AVS-qa bergen suhbatynda memhatshy Kabýldaǵy jaǵdai men 1975 jylǵy Saigondaǵy oqiǵalardy salystyrýdan bas tartty.
"Bul Saigon emes ekeni anyq. Másele mynada. Biz Aýǵanstanǵa 20 jyl buryn kirdik, bir mindet - 11 qyrkúiekte bizge shabýyl jasaǵandarmen kúresý. Bul mindet oryndaldy. Biz on jyl buryn Ben Ladendi jaýapqa tarttyq; bizge shabýyl jasaǵan top aitarlyqtai qysqardy. Aýǵanstannan bizge qarai taǵy da shabýyl jasaý múmkindigi - qazir mundai qater joq... Sondyqtan eger biz Aýǵanstanda ne istegimiz keletini týraly aitatyn bolsaq, onda biz mindetimizdi oryndadyq", - dedi Blinken.
Anonim qalǵysy kelgen amerikalyq sheneýnik jeksenbide "Golos Ameriki" basylymyna AQSh elshiliginiń Kabýldaǵy evakýatsiiasy "qyzý júrip jatqanyn" habarlady.
Sheneýnik Aýǵanstanǵa myńdaǵan amerikalyq ásker keletinin jáne elshiliktiń ainalasyn da, Kabýl túbinde ornalasqan Hamid Karzai halyqaralyq áýejaiyn da "tolyqtai basqaratynyn" aitty.
Aldaǵy kúnderi Kabýlǵa tórt myńǵa jýyq amerikalyq áskeri kúsh keledi dep josparlanyp otyr, keiingi kúnderi eldegi ásker sany 650 adamǵa deiin azaiyp ketken edi.
Eske salaiyq, 15 tamyzda "Taliban" terroristik qozǵalysy Aýǵanstannyń búkil aýmaǵyn baqylaýǵa alǵanyn jariialady. Keiin el prezidenti Ashraf Ǵani otstavkaǵa ketip, elden ushyp ketkeni týraly habar tarady.
