Joldaýda eldiń ekonomikalyq, áleýmettik, memlekettik basqarý, qarjy salasynyń damýyn tejeitin sebepter qaidan týyndaityny jan-jaqty taldanǵan. Bul týraly Qazaqstan halqy Assambleiasy tóraǵasynyń orynbasary Janseiit Túimebaev, aitty dep habarlaidy QazAqparat.
Onyń aitýynsha, «Jańa jaǵdaidaǵy Qazaqstan: is-qimyl kezeńi» Joldaýy - reformalar týraly Joldaý. Prezidentke tikelei baǵynatyn Strategiialyq josparlaý jáne reformalar agenttigi, Reformalar jónindegi Joǵarǵy Prezidenttik Keńes - memlekettik basqarýdyń tutas salasyna ainalýda, bul olardy tereń zertteýdi qajet etedi.
«Prezident Qasym-Jomart Toqaev eldiń áleýmettik-ekonomikalyq damýyn sapaly jańa deńgeige jetkizý boiynsha is-qimyldardyń tutas strategiiasyn aiqyndady. Olar áleýmettik ádilettilik, tiimdilik pen básekege qabilettilik sharttaryna negizdelgen. Qoǵam ómiriniń barlyq salalary tereń reformalaýdy qajet etedi – olar ekonomika, áleýmettik sala jáne eldiń saiasi ómiri. Reformalaýdyń tásili men printsipi ózgerýde. Zańnyń ústemdigi, adam men azamattardyń quqyqtaryn saqtaý memlekettik basqarýdyń jańa modeli arqyly júzege asyrylady. Al negizgi ekpin jergilikti ózin-ózi basqarýdy damytýǵa aýdarylady. Bul - azamattardyń ózderin tikelei tolǵandyratyn máselelerin sheshýge qatysýǵa degen múmkindikter», – dedi Janseit Túimebaev.
Sonymen qatar, ol Memleket basshysynyń Joldaýy Elbasy Nursultan Nazarbaevtyń saiasatymen sabaqtastyǵyn kórsetetinin atap ótti.
«Joldaý «Ulttyń jańa sapasy» bólimi «Rýhani jaǵyrý» baǵdarlamasymen naqty bailanysty. Qoǵamdyq sanany jańǵyrtýdyń jańa baǵyttary aiqyndalǵan: «Jaýapty memleket - jaýapty qoǵam - jaýapty adam». Bizdiń árqaisymyz aldaǵy reformalardyń qurylymdyq kúrdeliligi men tereńdigi úshin Qazaqstannyń revoliýtsiialyq emes, bir mándi evoliýtsiialyq damýy qajet ekenin túsinýimiz kerek»,– dedi ol.
Sondai– aq, ol respýblikalyq etnomádeni birlestik jetekshilerine birqatar baǵyt boiynsha jumystardy uiymdastyrýdy tapsyrdy.
«Bizdiń mindetimiz - osy mańyzdy qujatty túsindirýge jáne iske asyrýǵa belsendi qatysý. Respýblikalyq etnomádeni birlestikterdiń basshylarynan óz birlestikteriniń belsendilerimen kezdesýler ótkizýdi, Joldaýdy túsindirýge jáne iske asyrýǵa qatysý máselelerin talqylaýdy tapsyramyn. BAQ redaktorlary halyqqa Joldaýdyń mindetteri, sondai-aq olardy júzege asyrý boiynsha belsendi túsindirý jumystaryn júrgizýi kerek. Etnikalyq buqaralyq aqparat quraldarynyń resýrstary osy qyzmetke barynsha belsendi atsalysýy tiis», – dedi Qazaqstan halqy Assambleiasy tóraǵasynyń orynbasary J.Túimebaev.
Onyń aitýynsha, etnomádeni birlestikter halyqty mikrobiznes negizderine oqytý salasynda jobalar ázirlep, júzege asyra alady.
«Biz birqatar joba ázirlep jatyrmyz. Atap aitar bolsam, aýylda ómir súrý sapasyn jáne jumyspen qamtýdy jaqsartý aiasynda biz «Ár aýyldyń óz sheberleri» atty oqytý jobasyn bastaimyz. Bul aýyldaǵy eń ótkir máselelerdi sheshýge baǵyttalǵan «Aýyl - el besigi» baǵdarlamasynyń mindetterine tolyq jaýap beredi. Otbasy - qoǵamnyń bólshekteri. Sondyqtan «Otbasylyq biznes - ál-aýqat negizi» jobasy pysyqtalatyn bolady. Sonymen qatar, bizde kópultty otbasylar boiynsha joba júzege asyrylady. Jalpy, qazir ádettegi jumys formatynan naqty nátijeleri bolatyndai jobalarǵa kóńil bóli óte mańyzdy, – dep qortyndylady spiker.
