Nur-Sultan qalasynyń bas memlekettik sanitar dárigeriniń orynbasary Janna Pralieva demalys kúnderi isteitin nysandarǵa kirý tártibin túsinderdi, dep habarlaidy QazAqparat.
«28 tamyzdan bastap Ashyq boiynsha jumys isteitin nysandar demalys kúnderi jumys isteitin boldy. Osylaisha, mekemeler tún ortasyna deiin, al «Ashyq kóshbasshylaryna» túngi ekige deiin jumys isteýge ruqsat etiledi. Osy oraida talapqa sáikes, nysanǵa tek «jasyl» mártebeli qyzmetkerler men kelýshiler kiredi. Iaǵni, vaktsina alǵan, teris nátijeli PTR testi bar, sondai-aq turaqty meditsinalyq qarsy kórsetilimderi bar jáne sońǵy 3 aida koronavirýspen aýyrǵan adamdar úshin berilgen «jasyl mártebege» engender kiredi. Nysandarǵa tek «jasyl mártebe» ielerin kirgizý týraly talap senbi, jeksenbi kúnderi ǵana bolady. Al jumys kúnderi «jasyl» jáne «kók» mártebesi bar adamdar burynǵydai qala boiynsha erkin júre alady», - dedi Pralieva.
Onyń aitýynsha, demalys kúnderi «kók mártebesi» bar adamdarǵa qoiylǵan shekteýlerge qaramastan, oblysaralyq jáne oblysishilik turaqty tasymaldarǵa, qonaq úilerge, áýejailarǵa, temirjol vokzaldaryna, bilim berý obektilerine, joǵary oqý oryndary men kolledjderge, internattarǵa jáne bilim berý uiymdarynyń jataqhanalaryna jol beriledi.
«Bul sharalar koronavirýstyq infektsiianyń halyq arasynda taralý jáne juqtyrý qaýpin boldyrmaý úshin qabyldandy, sonymen qosa, mekemelerde «jasyl mártebesi» bar kelýshiler ózderin qaýipsiz seziný úshin. Halyqtyń kóp bóligi vaktsina almaiynsha, pandemiia aiaqtalmaitynyn jurt túsiný kerek. Bul bizge burynǵy jáne qalypty ómirge oralýǵa múmkindik beredi», - dedi ol.
