Qazaqstandyq boksshy Jánibek Álimhanuly (9-0, 5KO) jekpe-jek qarsańynda amerikalyq Rob Brantpen (26-2, 18KO) betpe-bet kezdesti. Bul Álimhanulynyń Brantpen alǵash ret júzdesýi, dep habarlaidy "Ult aqparat".
Jekpe-jek 27 maýsym, jeksenbi kúni, tańerteń Las-Vegasta (AQSh, Nevada shtaty) ótedi. Keshtiń basty oqiǵasy ýkrainalyq Vasilii Lomachenko (14-2, 10KO) men japon boksshysy Masaiosi Nakatani (19-1, 13KO) arasyndaǵy aiqas bolmaq.
Jánibek Álimhanuly buǵan deiingi sońǵy jekpe-jegin ótken jyldyń qazan aiynda ótkizip, argentinalyq Gonsalo Koriiany (16-4, 6ko) ekinshi raýndta nokaýtqa jibergen edi. Al Rob Brant 2020 jyldyń tamyzynda ringke shyǵyp, ýkrainalyq boksshy Vitalii Kopylenkony (28-3, 16KO) besinshi raýndta merziminen buryn jeńdi.
Aita keteiik, Álimhanuly-Brant kezdesýiniń tikelei transliatsiiasy Nur-Sultan ýaqyty boiynsha saǵat 08:00-de bastalady jáne «Habar» telearnasynan kórsetiledi.
