QR Bas memlekettik sanitariialyq dárigeri Jandarbek Bekshin Qytaimen shekaradaǵy júk kóligi júrgizýshilerin tekserý jumystary týraly aityp berdi, dep habarlaidy QazAqparat.
«Qytaimen shekarany aralaý nátijesinde, qytailyq jáne bizdiń taraptyń aýrý juqtyrý qaýpin azaitý maqsatynda Qazaqstannyń aýmaqtyq departamentterine, shekara qyzmeti men keden qyzmetine mindettemelerdi bólý shemalaryn jasaý tapsyryldy», - dedi Jandarbek Bekshin Ortalyq kommýnikatsiialar qyzmetinde ótken baspasóz máslihatynda.
Sonymen birge, J. Bekshin Qazaqstan men Qytai arasynda júk tasymalynyń toqtamaǵanyn atap ótti.
«Júk tasymalymen ainalysatyn qyzmetkerlerge, onyń ishinde júrgizýshilerge qatysty esh qaýiptiń joqtyǵyn anyqtadyq. Gazben ainalysatyn kólik júrgizýshileri úshin de qaýip joq. Olar kedendik aimaqqa eki saǵatqa kiredi jáne Qazaqstanǵa ótpeidi. Basqa da aýyr júk kólikteri júrgizýshileri shekara aimaǵynda tur. Qytailyq taraptan da, bizdiń taraptan da sharalar qabyldap jatyr. Kólik júrgizýshileri baqylaýǵa alynǵan», - dedi bas dáriger.
Onyń aitýynsha, tekserý jumystary kúnine eki ret júrgiziledi.
