Densaýlyq saqtaý ministrliginiń Taýarlar men kórsetiletin qyzmetterdiń sapasy men qaýipsizdigin baqylaý komiteti tóraǵasynyń orynbasary, Qazaqstannyń bas sanitarlyq dárigeri Jandarbek Bekshin Qytaidan búgin ushyp kelgen qazaqstandyqtardyń jaǵdaiyn baian etti, dep habarlaidy QazAqparat tilshisi.
«Beijińnen ushyp kelgen Qazaqstan azamattary – Qytaidyń 36 qalasynda turǵan. Olardyń bári de statsionarǵa jetkizilip, sonda jatqyzyldy. Úsh kúni boiy zerthanalyq jáne meditsinalyq tekserýden ótedi. Qazirgi ýaqytta olardyń densaýlyqtary qanaǵattanarlyq deńgeide. Olardy tekserý jumystary jalǵasady. Báriniń kóńil-kúii jaman emes. Shaǵymdary joq. Olardan koronavirýs infektsiiasy boiynsha zerthanalyq analiz alynady. Úsh kúnnen keiin tekseris qorytyndysy kúdikti seiiltse, álbette olar aýrýhanadan shyǵarylady», - dedi Jandarbek Bekshin OKQ-da ótken baspasóz máslihatynan keiin tilshilerdiń suraǵyna bergen jaýabynda.
Eske sala ketsek, Qytai astanasy Beijińnen búgin Qazaqstannyń 217 azamaty evakýatsiialanǵan bolatyn.
Sondai-aq, qazirgi ýaqytta Qazaqstanda koronavirýstyq infektsiianyń taralýyna jol bermeý boiynsha barlyq qajetti sharalar qabyldanyp jatyr.
QR Premer-Ministri Asqar Mamin búgingi Úkimet otyrysynda osylai dei kele Qazaqstanda koronavirýsqa shaldyqqandardyń joqtyǵyn málim etken bolatyn.
