Foto avtory: Nazerke Kýrmangazinova, Vlast.kz
Tirkelmegen "Dempartiia" jetekshisi, oppozitsiialyq saiasatker Janbolat Mamaiǵa Qańtar oqiǵasy kezinde "jappai tártipsizdik uiymdastyrdy" degen aiyp qaita taǵyldy. Bul belsendiniń isi boiynsha kezekti sot otyrysynan keiin anyqtaldy. Belsendiniń jaqtastary halyqaralyq uiymdar men aqparat quraldaryn Mamai isindegi zańsyzdyqtarǵa nazar aýdarýǵa úndedi, dep habarlaidy Azattyq radiosy.
26 qańtar kúngi sot otyrysynda aiyptaý aktisin oqyǵan prokýror Erkin Baimaǵambetov belsendi Janbolat Mamai 2022 jyly 4 qańtarda saǵat 18.30 ben 19.10 aralyǵynda "Almaty Arena" saraiy aldynda sóilegen kezde "qoǵam qarsylyǵyn arttyratyn" "destrýktiv tártipti nasihattady", "eldegi saiasi-ekonomikalyq ahýaldy turaqsyzdandyryp jiberýi múmkin" sózder aitty dedi.
Prokýrordyń aitýynsha, "Mamaidyń 3-4 qańtar kúngi sózderi men videomálimdemelerinde saiasi talaptar bar".
Mamaidyń jaqtastary taǵylǵan aiypty moiyndamai, onyń saiasi astary baryn aitty.
"Mine, 11 aidan asty, oǵan [Mamaiǵa] Qylmystyq kodekstiń túrli babyn ildi, birin alyp tastady, endi birin qaitaryp otyr. Janbolattyń jappai tártipsizdik uiymdastyrýǵa esh qatysy joq. Onyń barlyq sózi, qimyl-áreketi tikelei efirde kórsetildi, ózi de eldiń aldynda júrdi. Biz halyqaralyq uiymdardyń bári men Batys elderi úkimetterin, jýrnalister men quqyq qorǵaýshylardy Janbolat Mamaiǵa qarsy jasalyp otyrǵan zańsyzdyqqa nazar aýdarýǵa shaqyramyz" dep jazdy Inga Imanbai Facebook'ta.
"Qazaqstannyń demokratiialyq partiiasyn" tirkei almai kelgen oppozitsiialyq saiasatker Janbolat Mamai byltyr aqpanda Qańtar qurbandaryn eske alý jiynyna qatysqany úshin ustalǵan. 15 kún ákimshilik qamaýǵa alynǵan Mamai izinshe tergeý izoliatoryna aýystyryldy. Oǵan "jalǵan aqparat taratý" jáne "bilik ókilin qorlaý" baptary boiynsha aiyp taǵyldy.
Birneshe aidan soń Janbolat Mamaiǵa Qańtar oqiǵasy kezinde "jappai tártipsizdik uiymdastyrdy" degen taǵy bir aiyp taǵyldy. Mamai sol kezde "bilik ony 4 qańtarda "Almaty Arena" kesheni mańyndaǵy mitingini uiymdastyrdy dep kinálaǵysy keledi" degen. Myńnan astam adam jinalǵan mitingini sol kúni politsiia kúshpen taratqan edi. Mamai taǵylǵan aiypty joqqa shyǵaryp, tártipsizdikke qatyspaǵanyn aitqan. Aiyptardy saiasi qýdalaý dep ataǵan.
Qazan aiynda Janbolat Mamaidyń áieli Inga Imanbai Eýroparlamenttegi sózinen bir kún buryn kúieýine taǵylǵan "jappai tártipsizdik uiymdastyrdy" degen aiyp "beibit jiyn ótkizý tártibin buzý" (400-bap) babymen almastyrylǵanyn habarlaǵan edi. Inga Imanbai Janbolat Mamaiǵa taǵylǵan aiyptyń jeńildeýine halyqaralyq qysym túrtki boldy dep esepteidi.
Izinshe Janbolat Mamai tergeý izoliatorynan bosap shyqty. Sot oǵan qatysty bultartpaý sharasyn ózgertip, 8 aidan keiin tergeý izoliatorynan úiqamaqqa jibergen.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
