Foto: respublika.kz.media
Almaty qalasy Bostandyq aýdanynyń №2 aýdandyq soty Qańtar oqiǵasy kezinde Almatyda "jappai tártipsizdik uiymdastyrdy" dep aiyptalǵan oppzitsiiadaǵy saiasatker Janbolat Mamaidy 6 jylǵa shartty túrde bas bostandyǵynan aiyrdy. Sot úkimi búgin, 10 sáýirde shyqty, dep habarlaidy Azattyq radiosy.
Shartty jazadan bólek, sot Janbolat Mamaidyń qoǵamdyq-saiasi ispen, jýrnalistikamen ainalysýyna, áleýmettik jeli arqyly habar taratýyna, partiia, qoǵamdyq uiym qurýyna da alty jylǵa tyiym saldy. Sonymen qatar ol jábirlenýshi tarap – Almaty qalasy ákimdigine 600 myń teńge kóleminde materialdyq shyǵyn óteýge mindetti.
Janbolat Mamaiǵa "jappai tártipsizdik uiymdastyrdy", "bilik ókilin qorlady", "jalǵan aqparat taratty" degen aiyptar taǵylǵan.
Janbolat Mamai úkimge kelispeitinin jáne apelliatsiialyq shaǵym túsiretinin aitty.
– Kinásizdigime bultartpas aiǵaqtarmen dálel keltirdik. Sotta ondaǵan kýáger meniń tártipsizdikke shaqyrmaǵanymdy tolyq rastady. Siz buǵan qaramastan, osyndai úkim shyǵaryp otyrsyz. Bul úkimniń saiasi astary bar. Mundai úkimge kelispeimin, – dedi Mamai sýdiaǵa qarata.
"Qazaqstannyń demokratiialyq partiiasyn" tirkei almaǵan oppozitsiiadaǵy saiasatker Janbolat Mamai byltyr aqpanda Qańtar qurbandaryn eske alý jiynyna qatysqany úshin ustalǵan. 15 kún ákimshilik qamaýǵa alynǵan Mamai izinshe tergeý izoliatoryna aýystyryldy. Oǵan "jalǵan aqparat taratý" jáne "bilik ókilin qorlaý" baptary boiynsha aiyp taǵylǵan.
Birneshe aidan soń Janbolat Mamaiǵa Qańtar oqiǵasy kezinde "jappai tártipsizdik uiymdastyrdy" degen taǵy bir aiyp qosqan. Janbolat sol kezde "bilik meni 4 qańtarda "Almaty Arena" kesheni mańyndaǵy mitingini uiymdastyrdy dep kinálaǵysy keledi" degen edi. Myńnan astam adam jinalǵan mitingini sol kúni politsiia kúshtep taratqan. Janbolat Mamai taǵylǵan aiypty joqqa shyǵaryp, tártipsizdikke qatyspaǵanyn aitqan. Aiyptardy saiasi qýdalaý dep ataǵan.
37 jastaǵy Janbolat Mamaiǵa 2017 jyly qýǵyndaǵy bankir Muhtar Ábliazovtyń "qylmystyq jolmen tabylǵan qarjyny gazet shyǵarý arqyly zańdastyrýǵa qatysty" dep aiyppen úsh jyl shartty jaza berilgen. Ol kezde dúnie-múlkin tárkilep, úsh jyl jýrnalistik qyzmetpen ainalysý quqyǵynan aiyrǵan.
