Qazaqstan musylmandary dini basqarmasy janaza namazy men Qudaiy astardy ótkizýde saqtalýy tiis talaptardy jariialady, dep habarlaidy «Ult aqparat».
«Elimizdi dúrliktirgen indettiń qaýpi kúnnen-kúnge órship bara jatqany ózderińizge málim. Aýrý aityp kelmeidi. «Saqtansań – saqtaimyn» demekshi, tórtkúl álemge qaýip tóndirgen dertke nemqurailyq tanytý – ózimiz úshin ǵana emes, janymyzdaǵy jandardyń ómirine de áserin tigizeri haq», - dedi QMDB-dan.
Osy oraida, basqarma janaza namazy men Qudaiy astardy ótkizýde kelesi talaptardy ustanýǵa úndeidi:
– janaza namazyna bir ǵana dini qyzmetkerdiń qatysýy;
– janaza namazyna tek otbasy jáne jaqyn týmalarynyń qatysýy;
– janazaǵa jalpy sany 30 kisiden artyq jinalmaý;
– dene qyzýy nemese jóteli bar adamnyń janaza namazyna múlde qatyspaýy;
– janaza namazyna kelýshiler mindetti túrde sanitarlyq normalardy (betperde taǵý, meditsinalyq qolǵap kiiý jáne eki metrden kem emes araqashyqtyq) saqtaýy;
- koronavirýstan qaitys bolǵan máiitti dárigerdiń nusqaýlyǵyna sai jýý;
– janaza namazy men ýaǵyzdyń jalpy ýaqytyn 5 minýttan asyrmaý;
– janaza namazy barysynda qol alysyp amandaspaý;
– janaza namazynyń sabyn túzegende keminde eki metr qashyqtyqty saqtaý;
– qabir basynda máiit jer qoinyna tapsyrylǵannan keiin jamaǵatty tezdetip qaitarý;
– jasy úlken kisiler, densaýlyǵy nashar adamdardyń (er jáne áiel) jáne jas balalardyń janaza namazdaryna qatyspaýy;
– qonaqasyn ótkizbeý;
– janazadan keiingi asty ótkizbeýge nemese otbasy múshelerimen shektelý.
Qudaiy astarǵa (jetisi, qyrqy, júzi, jyly jáne taǵy basqa) qatysty kelesi talaptar oryndalýy qajet:
– astardy ótkizbeý nemese otbasy músheleri men jaqyn týmalarymen shektelý;
– bir ǵana dini qyzmetkerdiń qatysýy;
– sanitarlyq normalardy (betperde taǵý, meditsinalyq qolǵap kiiý jáne araqashyqtyq) saqtaý.
«Alla Taǵala qasietti Quranda: «Óz-ózderińdi óz qoldaryńmen qaýip-qaterge salmańdar», – dep eskertedi. Óz ómirimiz ben densaýlyǵymyz – Alla Taǵalanyń bizge bergen amanaty.
Alla Elshisi (oǵan Allanyń salaýaty men sálemi bolsyn) óziniń bir ósietinde adam balasynyń ózine de, ózgege de ziian keltirýine qatań túrde tyiym salǵan.
Shariǵatta qandaida juqpaly aýrýdyń belgisi taraǵan kezde aýrýdyń etek alýyn toqtatýda karantin qajet ekeni atap aitylǵan. Sondyqtan qazirgidei kózge kórinbeitin ziiandy dert taraǵan kezde onyń aldyn alý – árbir musylman balasy úshin mindet», - deidi QBDM-dan.
Eske sala ketsek, búgin QR Premer-Ministri Asqar Maminniń tóraǵalyǵymen ótken Memlekettik komissiia otyrysynda 5 shildeden bastap elimizde 14 kúnge qatań shekteý sharalaryn engizý sheshimi qabyldandy.
