Janat Elimanov qarjylyq monitoring agenttiginiń tóraǵasy bolyp qaita taǵaiyndaldy, - dep habarlaidy "Ult aqparat" Aqordanyń baspasóz qyzmetine silteme jasap.
"Janat Qaldybekuly Elimanov Qazaqstan Respýblikasy Qarjylyq monitoring agenttiginiń tóraǵasy laýazymyna taǵaiyndalsyn", - delingen Prezident Jarlyǵynda.
Janat Elimanov 1978 jyly Qaraǵandy qalasynda dúniege kelgen. E.Bóketov atyndaǵy Qaraǵandy memlekettik ýniversitetin bitirgen.
Eńbek jolyn 2000 jyly Qaraǵandy qalasy prokýratýrasynyń sot qaýlylary jáne atqarýshylyq is júrgizýdi oryndaýdaǵy zańdylyqty qadaǵalaý bólimi prokýrorynyń m. a. qyzmetinen bastaǵan. 2000 jyldan 2007 jylǵa deiin Qaraǵandy oblysynyń jáne Astana qalasynyń prokýratýra organdarynda jumys istegen.
2007 jyldan 2017 jyl aralyǵynda Ádilet jáne Qarjy ministrlikteriniń, QR Ekonomikalyq jáne sybailas jemqorlyq qylmystarymen kúres agenttiginiń qurylymdarynda túrli qyzmetterdi atqardy.
2017 jyldan 2019 jyl aralyǵynda QR Bas prokýratýrasynyń qurylymdyq bólimshelerinde basshylyq laýazymdar atqardy.
2019 jyldyń aqpan aiynan sáýir aiy aralyǵynda Qaraǵandy oblysy prokýrorynyń orynbasary boldy.
2019 jylǵy sáýirden bastap qazirgi tańǵa deiin QR Qarjy ministrliginiń Qarjy monitoringi komiteti tóraǵasynyń orynbasary laýazymyn atqarǵan.
