Atyraý munai óńdeý zaýyty maýsymaralyq dizel otynyn óndirýge kirisedi, dep habarlaidy QazAqparat.
Kásiporynnyń baspasóz qyzmetiniń málimetinshe, óndiristik josparǵa jáne ishki naryqtyń suranysyna sáikes, –5 gradýsta qatpaityn maýsymaralyq dizel otynyn shyǵarýǵa tehnologiialyq qondyrǵylardy daiyndaý júrip jatyr.
«Bul ónim aýa temperatýrasy 5 gradýstan tómendemeitin maýsymaralyq kezeńde tutynýǵa arnalǵan. Zaýytta qaita jańǵyrtý jobasy sheńberinde salynǵan jańa tehnologiialyq qondyrǵylardyń nátijesinde 2019 jyly K4 ekologiialyq klasyna jatatyn dizeldiń (DT-E) osy túrin óndirý bastaldy. Aýa temperatýrasy tómendegen kezde dizel otynnyń –15, –25, –32 jáne Khazar-38, Altay-45 sekildi túrlerin shyǵarýdy bastaidy» - dep habarlady zaýyttyń baspasóz qyzmeti.
Biylǵy qyrkúiekte Energetika ministrligi ishki naryqty dizel otynymen qamtýdyń kúrdeli jaǵdaiyna bailanysty «QazMunaiGaz» UK AQ-men birlesip, Atyraý munai óńdeý zaýytynda júrgiziletin aǵymdaǵy jóndeýdi keiinge qaldyrý týraly sheshim qabyldanǵan.
«Atyraý munai óńdeý zaýyty biylǵy 8 aida 1 027 123 tonna dizel otynyn óndirdi. Bul byltyrǵy osy kezeńdegimen salystyrǵanda 10,5 myń tonnaǵa artyq. Zaýyt 8 aida tapsyrys berýshilerge 1 mln 032 myń tonna dizel jiberdi. Bul ótken jylǵydan 13 myń tonnaǵa artyq. Biylǵy 5 mamyrda dizel otynynyń taýarlyq parkiniń rezervýarlary iske qosyldy» - dep málim etti baspasóz qyzmetinen.
