© Sputnik/Aleksandr Miroglov
Bas prokýrordyń orynbasary Áset Shyndaliev qańtar oqiǵasy kezinde qaza bolǵandarǵa qatysty qylmystyq isterdi tergeý barysy týraly aqparat berdi, dep habarlaidy Sputnik Qazaqstan.
Qazirgi kezde qasaqana adam óltirý boiynsha 150-ge jýyq qylmystyq is qozǵaldy. Biraq tergeý kezinde áli de kóp nárseni anyqtaý kerek.
"Mysaly, kúzet salasynyń qyzmetkerleri nysandy qorǵaý kezinde adam óltirgen. Sondai-aq janar-jaǵarmai stantsiiasynda adamdar janyp ketken. Ol jerde quqyq qorǵaý qyzmetkerleri bolmaǵan, eshkim bolmaǵan. Ózderi janyp ketken be, bireý jaǵyp jibergen be, túsiniksiz. Qazir osynyń bári tekserilip jatyr", - dep atap ótti Shyndaliev
Osy oraida bas prokýrordyń orynbasary adam ólimi boiynsha tergeý jumysy ne sebepti uzaryp ketkenin túsindirdi.
"Kóbisi jappai tártipsizdikter kezinde qaza tapty. Sosyn antiterroristik rejim engizildi. Sol kezde tergeý toptary oqiǵa ornyna shyǵa almady. Meditsina qyzmetkerleri ólgen adamdardyń denesin birden máiithanaǵa apardy. Oqiǵa ornynda tekseris jasalmady, qajetti aiǵaqtar jinalǵan joq. Al marqumdardy týystary birden máiithanadan áketip, jerlep otyrǵan. Soǵan qaramastan, tergeý organdary qajetti tekseristi júrgizip jatyr. Qaitys bolǵan adamdardyń qalai jáne qaida barǵany zerdelenedi. Balistikalyq saraptamalar da taǵaiyndaldy" , - dep atap ótti Shyndaliev.
Onyń aitýynsha, adam óltirý boiynsha barlyq is Qylmystyq kodekstiń úsh baby - 99 (Adam óltirý), 362 (Bilikti asyra paidalaný) jáne 146 (Azaptaý) boiynsha tergelip jatyr. Kináli adamdar raqymshylyqqa ilinbeidi.
