Almaty oblysy ákiminiń orynbasary Serikjan Beskempirov «Kóksý qant zaýyty» JShS-ne baryp, onda júrip jatqan kúrdeli jóndeý jumystarymen tanysty. Ákim orynbasaryn Kóksý aýdanynyń ákimi Almas Ádil men «Kóksý qant zaýyty» JShS-niń direktory Ádilbek Abatov óndiris ornyndaǵy sońǵy jańalyqtardan habardar etip, aldaǵy jumys josparyn tanystyrdy.
Esterińizge sala ketsek, ótken jyly oblysymyzda 6 myń gektardan astam jerge qant qyzylshasy sebilip, jospardaǵydai ónim alyndy. Alaida, ónimdi qabyldaý barysynda biraz qiynshylyqtardyń bolǵany ras. Osy kemshilikti boldyrmaý úshin atalǵan zaýyt biyl 1 mlrd. teńge kóleminde investitsiia tartyp, zaýyt qurylǵylaryn jańartyp, jumys aýqymyn keńeitýmen qatar ónim sapasyn arttyrýdy qolǵa aldy. Osyndai eńbektiń nátijesinde zaýyttaǵy qurylǵylar 100 paiyzǵa jańartylyp, qazir aldaǵy qant qyzylshasyn qabyldaý naýqanyna 50 paiyzǵa daiyn.
«Kóksý qant zaýyty» JShS direktory Ádilbek Abatovtyń aitýynsha, búginde zaýyttyń kúrdeli jóndeý jumystaryna 200-ge tarta adam jumyldyrylǵan. Burynǵy Keńes odaǵy kezindegi kónergen qurylǵylar Shveitsariia, Germaniia, Ýkraina, Resei, taǵy da basqa elderden alynǵan zamanaýi jabdyqtarmen aýystyrylady. Sonymen qatar, qant qyzylshasy tógiletin alańnyń teń jartysyn biyl tsementpen qatyryp, jańartý jumystary da qosa atqarylýda. Qant qyzylshasyn qabyldaý qondyrǵylary Germaniiada shyǵarylǵan qýattylyǵy joǵary eki qurylǵymen tolyqpaq.
– Zaýyt jylyna 220 myń tonna qant qyzylshasyn qabyldaýǵa qaýqarly. Búginge deiin qolda bar tehnikamen shikizattan 12 paiyz taza ónim alyp keldik. Al jańartylǵan qurylǵylar ónimniń sapasyn arttyryp, eńbek kúshin únemdeý, qant qyzylshasyn qabyldaý múmkindigin arttyrady. Iaǵni, aldaǵy ýaqytta jańa qurylǵylardyń kómegimen qant qyzylshasynyń ár tonnasynan 13-14 paiyz taza ónim alýǵa qol jetkizetin bolamyz, – deidi zaýyt direktory.
Biz zaýyt aýmaǵynda júrip jatqan qyzý jumysty ákim orynbasarymen birge kórip, joǵaryda aitylǵan jailarǵa qanyqtyq. Zaýyt aýlasyndaǵy shetelden ákelingen jańa qurylǵylardyń jumysymen de tanystyq.
Sharanyń sońynda jýrnalisterdiń suraǵyna jaýap bergen Serikjan Islámuly:
– Óńirimizde jyl saiyn qant qyzylshasyn ósirýge degen ynta artyp keledi. Biyl «Kóksý qant zaýyty» JShS 220 myń tonna, «Aqsý qant zaýyty» JShS 100 myń tonnadan astam qant qyzylshasyn qabyldaidy dep josparlanýda. Demek, biyl 36 myń tonnadan astam taza qant alamyz degen oidamyz. Sondai-aq, biylǵy ózgeristerge orai zaýyt satyp alǵan qant qyzylshasynyń qunyn ózderi tólese, demeýqarjy oblystyq aýylsharýashylyq basqarmasy arqyly tólenedi. Demek, sharýalardyń jyl boiy tókken teriniń aqysyn artyǵymen alýǵa bar múmkindik jasalýda, – dedi ol.
Qajet ANDAS
