"Arnaý" tobynyń eks-ánshisi Janar Hamitova qaitys boldy, dep habarlaidy Sputnik Qazaqstan.
Bul týraly aqparatty telejúrgizýshi Anna Danchenko rastady.
"Ánshiniń qaitys bolǵany týraly aqparat ras. Bul aqparatty maǵan Janardyń aǵasy rastady. Onyń aitýynsha, Janar búgin tańǵy saǵat 9-da Qaraqaraly óńirindegi óz aýylynda qaitys bolǵan. Alaida neden qaitys bolǵany belgisiz. Ol týraly aǵasy aitqan joq", - dedi ol.
Ártistiń qaitys bolǵanyn ánshi Sivi Mahmýdidiń ókili de rastady.
Janar Hamitova 1989 jyly Qaraǵandy oblysy Qarqaraly aýdanynda dúniege kelgen. Jastaiynan mýzykaǵa qabileti baiqalǵan. 5 jyl dombyra úiirmesine baryp, 8-synyptan án aita bastapty.
2006 jyly Super Star mega jobasyna qatysty. Bul jobadan soń Janar túrli mýzykalyq toptardyń quramynda óner kórsetti. Keiin Nurjan Kermenbaevpen birge "Arnaý" dýetiniń ánshisi boldy. 2009 jyly ol "Arnaý" dýetiniń quramynan bólinip ketti.
2019 jyldyń sáýir aiynda Janar Hamitova "Astarly aqiqat" baǵdarlamasyna bergen suqbatynda jupyny ómir súretinin, Almatyda jalǵyz páter jaldap turatynyn, arasynda meiramhanada ydys jýyp, kún kóretinin aitqan. Baǵdarlama barysynda ánshi sahnaǵa oralǵysy keletinin de atap ótken.
Onyń bul armanyn júzege asyrýǵa ánshi Sivi Mahmýdi kómektesken. Qazaqstandyq BAQ-taǵy málimetke sáikes, Sivi Janardy óz qamqorlyǵyna alyp, "aiaqqa turýyna kómektesken". Keiin ánshilerdiń arasynda túsinbestik paida bolypty. Muny Sivi Janardyń aýyr minezimen bailanystyrǵan edi.
