videodan alynǵan kadr
14 sáýirde Astanadan Mańǵystaýǵa jetken bir top munaishy "Ózenmunaigaz" kompaniiasynyń aldyna kelip, narazylyqty jalǵastyrdy. Olar videoúndeýde talaptary oryndalmaiynsha, sol mańnan ketpeitinin málimdedi, dep habarlaidy Azattyq radiosy.
– Biz Astanadan aman-esen úiimizge oraldyq. Naqty sheshim shyqqan joq. Biz qalǵan jigitter [Astanadan] kelgenshe, sheshim shyqpaiynsha, "Ózenmunaigaz" ǵimaraty aldynda bolamyz, – deidi munaishylardyń biri.
Al, bir kún buryn olar stantsiialardyń birinen videomálimdeme joldap, talaptary oryndalmasa, Astanaǵa barýǵa daiyn ekenin habarlaǵan edi.
Aita keteiik, 13 sáýirde munaishylardyń 10 ókili men "QazMunaiGaz" arasynda kelissóz bastalǵan. Jumysshylar ortaq sheshimge kele almaǵanyn jáne aldanǵanyn aitqan.
14 sáýirde kúndiz "QazMunaiGaz" ulttyq kompaniiasy habarlama taratyp, kelissózdiń barysy týraly aqparat berdi.
QMG ókilderiniń aitýynsha, "BerÁli Mańǵystaý Company" mekemesiniń burynǵy jumysshylary ózderin "Ózenmunaigazǵa" shtatqa alýdy talap etken. Kompaniianyń aitýynsha, "bul talapty oryndaý múmkin emes, sebebi jumysqa kezekke 9 myń adam tur".
Narazylar sonymen birge merdiger kompaniialarmen kelisimdi uzaq merzimge jasaýdy talap etken. QMG kelisimshartty "3+2"shemasy (úsh jyldyq kelisim, qosymsha 2 jylǵa sozýǵa bolady) boiynsha ázirleýge daiyn ekenin bildirgen.
QMG eńbekti qorǵaý men uiymdastyrý, biryńǵai tarif-biliktilik anyqtamasyn qoldaný, tender protsedýralary máseleleri boiynsha táýelsiz komissiia qurýdy qolǵa alatynyn habarlady. Kelissóz jalǵasyp jatyr.
Eske salaiyq, 11 sáýirde keshkisin politsiia Jańaózen qalasynan turaqty jumys berýdi talap etip Astanaǵa arnaiy kelgen ondaǵan munaishyny Energetika ministrligi ǵimaratynyń aldynan kúshtep alyp ketken. Túni boiy politsiia bóliminde bolǵan munaishylardyń kóbi 12 sáýirde tańerteń poiyzben Mańǵystaýǵa qaitqan. Olardyń 10 ókili Astanada qalyp, 13 sáýirde kúndiz "QazMunaiGazben" kelissózdi jalǵastyratyny habarlanǵan.
video: Lada.kz
