Mańǵystaý oblysy Jańaózen qalasynda teplovoz ben «Gazeldiń» soqtyǵysýy saldarynan qaza bolǵandar men zardap shekkenderdiń otbasylaryna óńir biýdjetinen qarjylai kómek kórsetiledi. Mundai tapsyrmany búgin apparattyq keńeste aimaq basshysy Eraly Toǵjanov júktedi, dep habarlaidy "Ult aqparat".
Atap aitsaq, apatta qaza bolǵandardyń otbasylaryna 1 mln.teńge, aýyr halde jatqan 9 adamǵa 500 myń teńge beriledi. Japa shekken taǵy 18 adamǵa 300 myń teńge bólinbek.
Sonymen birge, búgin aimaq basshysynyń tóraǵalyǵymen ótken apparattyq jiynda oblystaǵy barlyq memlekettik organdardyń 1 kúndik jalaqysyn jol apatynda zardap shekkenderdiń otbasylaryna aýdarý týraly sheshim qabyldandy.
Jańaózen qalasyndaǵy ákimdik janynan 15 adamnan turatyn komissiia quryldy. Komissiia músheleri jol apatynan kóz jumǵan jáne jaralanǵan otbasylarǵa kómek kórsetýmen ainalyspaq. Sondai-aq, materialdyq kómek kórsetý úshin qaiyrymdylyq qory quryldy. Komissiia men qaiyrymdylyq qorynyń jumys barysyn oblys ákimi Eraly Toǵjanov tikelei qadaǵalaityn bolady.
Esterińizge sala keteiik, 25 qarasha kúni Jańaózen mańyndaǵy Teńge eldi-mekeninde teplovoz ben «Gazel» kóligi soqtyǵysty. Apat saldarynan 36 adam zardap shekti. 9 adam qaitys bolyp, 27 adam jaraqat alǵan.
