Foto: QR TJM
Jańaózen qalasynda turǵyn úidegi jarylystan qaza bolǵandar sany 4 adamǵa jetti. Olardyń arasynda úsh jasar qyz bar. Bul týraly Mańǵystaý oblysynyń ákimi Nurlan Noǵaev málimdedi, dep habarlaidy "Ult aqparat".
Oblys ákimi Jańaózendegi jaǵdaiǵa bailanysty shuǵyl brifing ótkizdi.
Onyń aitýynsha, búgin tańerteń elorda ýaqytymen tańǵy 05:04-te Jańaózen qalasy Shuǵyla aýdanynda 51-úide jarylys bolǵany týraly habar túsken.
"Ekiqabatty úidiń oń qaptaly, ekinshi kireberinde jarylys boldy. Alǵashynda gaz ballony jarylǵan degen boljam boldy, al qazir mamandardyń tekserisinen keiin gaz ballony emes, gaz qospasynyń jarylýy yqtimal degen boljam bar", - dedi Noǵaev.
Jalpy TJ saldarynan 17 adam zardap shekken, sonyń ishinde 4 adam qaza tapty: bir er adam, eki áiel jáne úsh jasar qyz.
Úsh adam Jańaózen qalasynyń emhanasynda jansaqtaý bóliminde, taǵy úsh adam travmatologiia bóliminde jatyr. Qalǵandary dárigerlerdiń tekserisinen keiin úilerine jiberilgen.
Tótenshe jaǵdaiǵa bailanysty vedomstvoaralyq komissiia qurylǵan. Ol jarylys sebepteri men onyń saldaryn joiý jumysymen ainalysady.
Sondai-aq, TJ faktisi boiynsha qylmystyq is qozǵaldy.
Óńir basshysy óz sózinde jarylystan qaza bolǵandardyń otbasy men jaqyndaryna kóńil aitty. Sondai-aq ol zardap shekken turǵyndarǵa baspana jáne basqa da qoldaý kórsetýdi ákimdik óz jaýapkershiligine alatynyn atap ótti.
