Jańaózen qalasynda gaz quiý beketterinde gaz baǵasy 55 teńgeden satylatyn boldy, dep habarlaidy "Ult aqparat".
Osyǵan deiin suiytylǵan gaz baǵasy 60-65 teńgege kóterilgen edi. Keibir qoǵam belsendileri ony túsirip, áleýmettik jelige salsa, keibir turǵyndar ákimdik alańyna arnaiy baryp, shahar basshysy Maqsat Ibaǵarovpen kezdesip, talaptaryn bildirdi. Turǵyndar gaz baǵasynyń negizsiz ósýine jol bermeýdi qatań qadaǵalaýdy surady.
Osyǵan bailanysty qala ákimi arnaiy jiyn ótkizip, oǵan osy máselege jaýapty mamandardyń barlyǵy qatysty. Jiynda Mańǵystaý oblysynyń energetika jáne turǵyn-úi sharýashylyǵy basqarmasy basshysynyń orynbasary Berdibek Qartbaev elektrondy saýda alańy, limit máselesi jóninde túsinik berdi.
Onyń sózinshe, baǵanyń kóterilýiniń basty sebebi «Qazaq gaz óńdeý zaýyty» JShS óndiretin suiytylǵan gazdyń elektrondy saýda alańyna shyǵarýyna bailanysty bolǵan.
Qala ákimi osy másele boiynsha ótkizilgen jiynda ashyq dialog bolǵanyn atap ótti.
«Jiynda ashyq dialog qurdyq, kásipkerler óz usynystaryn bildirdi. Kelissózder nátijesinde quzyrly organdarǵa naqty tapsyrmalar berilip, qalaǵa keste boiynsha bólingen gazdy 55 teńgeden satý jóninde sheshim qabyldandy. Sondai-aq birneshe jeke kásipkerdiń suiytylǵan gazdy elektrondy saýda alańy (ESA) arqyly satyp alǵany anyqtalyp, olarǵa ESA arqyly satyp alynǵan gazdy 57 teńgeden saýdalaýǵa ruqsat etildi. ESA arqyly satyp alynǵan gaz bitken soń kestege sai satyp alynǵan gaz 55 teńgedan saýdalanady», - dep habarlady qala ákimi Maqsat Ibaǵarov.
«Qazaq gaz óńdeý zaýyty basshylyǵyna suiytylǵan gazdy kásipkerlerge kestege sai úlestirýge, baǵany túsirý úshin olardyń árqaisysyna qosymsha 10 tonna gaz berý tapsyryldy. Sondai-aq, suiytylǵan gaz kóp mólsherde qajet bolatyn kóktem-jaz ailarynda qosymsha gaz bólý máselesi aldaǵy ýaqytta qaralatyn bolady»,-dep atap ótti shahar basshysy.
