Foto: Polisia.kz
Qyzylorda oblysynda zańdy talapqa baǵynbai, kóligimen politsiia qyzmetkerlerin 500 metrge súirei jónelgen júrgizýshi qamaýǵa alyndy, dep habarlaidy "Ult aqparat" Polisia.kz saityna silteme jasap.
8 tamyzda Jańaqorǵan aýdandyq politsiia bóliminiń patrýldik qyzmetkerleri aimaqty aralaý barysynda jolda júrý erejelerin buzǵan kólik júrgizýshisin toqtatqan. Politsiia qyzmetkerleri zań sheńberinde kólik júrgizýshisine avtokólikten túsip, qujattaryn kórsetýin suraǵan ýaqytta júrgizýshi olardyń zańdy talabyna baǵynbai, oqiǵa ornynan “izin sýytpaq” bolǵan.
Kólik júrgizýshisi dórekilik tanytyp, ózin óte agressivti ustaǵan. Qarsylyq kórsetkennen bólek ol kóliginiń memlekettik nómirin sheship alyp, kólikti toqtatý maqsatynda árekettengen politsiia qyzmetkerlerin kóligimen 500 metrge deiingi qashyqtyqqa súirei jónelgen. Sonyń saldarynan politsiia qyzmetkerleri túrli dárejedegi jaraqattar alǵan.
"Atalǵan derek boiynsha QR QK-niń 380-babynyń 4-bóligi 1-tarmaǵyna (Bilik ókiline qatysty qorqytý nemese kúsh kórsetý áreketteri) sáikes sotqa deiingi tergep-tekserý áreketteri júrgizilip jatyr. Tiisti saraptamalar taǵaiyndaldy.
Kólik júrgizýshisi Jańaqorǵan aýdandyq politsiia bóliminiń ýaqytsha ustaý izoliatoryna qamaldy. Avtokólik aiyp alańyna qoiyldy.
Joǵaryda atalǵan bap boiynsha kúdikti úsh jyldan jeti jylǵa deiingi merzimge bas bostandyǵynan aiyrý túrindegi jazaǵa tartylýy múmkin. Qazirgi ýaqytta politseilerge qarsylyq kórsetý, kúsh qoldaný derekterine qatysty qylmystyq isterdiń aqtalmaityn negizde qysqartý tájiribesi toqtatylǵandyǵyn eskertemiz, – dedi Qyzylorda oblysy politsiia departamentiniń bastyǵy Mahsýdhan Ablazimov.
Aita ketetin jait, jyl basynan Qyzylorda oblysynda politseilerge qarsylyq kórsetýdiń 6 deregi bolǵan. Árbir is boiynsha zań sheńberinde tiisti sheshim qabyldanǵan.
