Foto: Kazinform
7 aqpanda Jańaqorǵan aýdandyq soty Jańaqorǵan aýdanynyń bilim bólimi basshysy B. Ibragimovqa, bas býhgalteri K. Aiazbaevaǵa jáne 24 mekteptiń býhgalterine úkim shyǵardy.
Olar jalpy somasy 1 mlrd teńgeden asa iri mólsherde biýdjet qarajatyn jymqyrǵany úshin kináli dep tanyldy.
Sot úkimimen mekemeniń basshysyna jáne bas býhgalterine 8 jyl bas bostandyǵynan aiyrý, mektep býhgalterleriniń birine — jas balanyń asyraýynda bolýyna bailanysty 5 jyl merzimge jazasyn keiinge qaldyra otyryp, 7 jyl bas bostandyǵynan aiyrý jazasy taǵaiyndaldy.
Sonymen qatar sottalǵandar memlekettik qyzmette jáne ózge de uiymdarda qyzmet atqarý quqyǵynan ómir boiy aiyrylady.
Úkim zańdy kúshine engen joq.
Sybailas jemqorlyqqa qarsy qyzmet bilim berý salasyndaǵy jemqorlyq táýekelderine syrtqy taldaý júrgizý barysynda eńbekaqy tóleý qorynan qarajat jymqyrýmen bailanysty turaqty qylmystyq shemalardy ashty:
1) qyzmetkerlerge jalaqy onyń laýazymynan qaraǵanda áldeqaida kóp aýdarylǵan;
2) jalaqy bilim mekemelerinde resmi túrde tirkelmegen adamdarǵa berilgen;
3) qyzmetkerdiń kart-shottaryna jalaqy eseptelip, al tólem qujattarynda basqa tulǵanyń derekteri kórsetilgen;
4) bir adamǵa aqsha aýdarymdaryn birneshe ret qaitalaǵan;
5) «óli jandarǵa» — týystary men jaqyndaryna aqsha aýdarǵan.
Býhgalterler mekteptiń býhgalterlik esep júieleri, ulttyq bilim berý bazasy jáne «Qazynashylyq-klient» júiesi arasyndaǵy integratsiianyń joqtyǵyn paidalanǵan.
Olar tólem qujattaryna qolmen túzetý engizip, biýdjet aqshasyn jymqyrǵan. Jyl saiynǵy biýdjettik ótinimderdi qalyptastyrý kezinde jymqyrylatyn qarajat belgilengen.
Aita ketý kerek, jymqyrý boiynsha buryn ashylǵan shemalar sheńberinde sotqa deiingi tergeýlerdi búginde basqa quqyq qorǵaý organdary júrgizýde.
