QR Memlekettik hatshysy Erlan Qarin Youtube arnasynda konstitýtsiialyq reforma týraly kezekti video jariialady, dep habarlaidy QazAqparat.
Konstitýtsiialyq reforma qarapaiym halyqqa ne beredi? Saiasattan alys, qarapaiym turǵyndar budan ne utady? Konstitýtsiialyq túzetýlerdiń halqymyzǵa qandai paidasy bar?
Bul jolǵy rolikte Memlekettik hatshy osy suraqtarǵa jaýap berýge tyrysqan.
«Bul reformanyń oń áserin elimizdiń búkil azamaty sezinetin bolady. Birinshi. Konstitýtsiialyq keńes Konstitýtsiialyq sot bolyp qaita qurylady. Ol osy organnyń ataýy ǵana ózgeredi degen sóz emes. Quzyry odan áldeqaida aýqymdy, múlde basqa, jańa institýt paida bolady. Konstitýtsiialyq sot Ata zańǵa qaishy keletin kez kelgen zańnyń nemese ózge de quqyqtyq aktiniń kúshin joia alady», - deidi Erlan Qarin.
Sondai-aq, ol Konstitýtsiialyq sotqa júginý tártibi qalai retteletinin túsindirdi.
«Konstitýtsiialyq sotqa Prezident, Senat pen Májilis tóraǵalary, Parlament depýtattarynyń kem degende besten biri, Premer-Ministr, Adam quqyqtary jónindegi ýákil, Bas prokýror jáne eń bastysy, elimizdiń kez kelgen azamaty júgine alady. Iaǵni, kez kelgen azamat qandai da bir normativtik akt onyń Ata zańda bekitilgen bostandyqtary men quqyqtaryn shekteidi dep sanasa, Konstitýtsiialyq sotqa shaǵymdana alady. Mundai quqyqtardyń aýqymy keń. Konstitýtsiialyq sottyń sheshimi qabyldanǵan kúnnen bastap kúshine enedi jáne elimizdiń búkil aýmaǵynda jalpyǵa mindetti sanalady. Mundai túpkilikti sheshimderge shaǵym keltirýge bolmaidy», - dedi Memlekettik hatshy.
