Foto: rail-news.kz
Elde jańa jyldyq mereke qarsańynda áýe reisteri men poiyzdardyń sany artady, dep habarlaidy Ult.kz 24KZ-ke silteme jasap.
Tek temirjoldyń ózimen 43 myń jolaýshyny tasymaldaý josparlanyp otyr. Bilet tapshylyǵyn qalai sheshedi? Jańa jyl qarsańynda turǵyndar bilet tappai, áýre-sarsańǵa túsedi. Tapqan kúnniń ózinde qymbat. Kúrmeýli máseleni sheshý úshin áýe jáne temirjol kompaniialary reisterdiń sanyn ulǵaitatynyn aldyn ala jariialady.
Viktoriia Starojilova, áýe kompaniianyń PR jáne marketing bóliminiń basshysy:
- Biz jeltoqsan men aldaǵy qańtar aiynda Astana, Almaty, Shymkent, Aqtaý jáne Atyraý qalalarynda ishki baǵyttar boiynsha reister sanyn arttyrdyq. Sondai-aq Almaty-Máskeý baǵytyna 12 qosymsha reis qosyldy.
Qosymsha reister qosylsa da, bilet tapshylyǵy máselesi sheshilmei otyr. Suranys kóp. Jurt: «Bilet satyp alyp úlgermeimiz», – deidi.
Arýjan: - Jaz ailarynda ǵana emes, kúzde de, qysta da, kóktemde de bilet tapshy. Biraq poiyzǵa minseń, bos vagondy kóremiz. Bul másele qalai, qashan, qaitip sheshiledi eken?!
Erasyl: - Biletter bir jarym ai buryn satýǵa shyǵarylady. Alaida sol satylymǵa shyqqan bette bilet joq, tappaimyz.
Inabat: - Aldymen biletter tabylmaidy. Artynsha qosymsha reister paida bolady. Biraq baǵalary ýdai.
Máselen, Aqtóbege baratyn ushaqqa bilet 120 myń. Mereke kúnderi qansha adam óz otbasymen qaýysha almaidy.
Serik: - Men úsh apta buryn Oralǵa bilet almaqshy boldym. Alaida bári satylyp ketken.
Biletterdiń baǵasy suranysqa qarai qoiylady. Áýe kompaniiasynyń ókili osylai deidi. Ádette arzan biletter tez satylyp ketedi.
Viktoriia Starojilova, áýe kompaniiasynyń PR jáne marketing bóliminiń basshysy: - Mereke kúnderi suranys artatyndyqtan, arzan tarifter lezde satylady. Alaida áýe kompaniiasynyń tarifteri 2020 jyldyń shildesinen bastap ózgergen joq.
Temirjol biletterin alý áýe biletterine qaraǵanda ońaiyraq.
Kólik ministrligi ókiliniń málimdeýinshe, olardyń qunyn memleket retteidi jáne mereke kúnderi tarifter ózgerissiz qalady.
Liazzat Stamǵazieva, QR Kólik ministrliginiń resmi ókili: - Qazan aiynda 20% ósim boldy. Endi jańajyldyq merekelerde ósý bolmaidy. Tarif ózgerissiz qalady. Buryn platskarttyń baǵasy qalai bolsa, qazir de solai bolady. Mereke qarsańynda túrli baǵyttar boiynsha júretin qosymsha poiyzdar iske qosylady. Bul poiyzdar qosymsha 43 myń jolaýshyny tasymaldaýǵa múmkindik beredi.
Tyǵyryqtan shyǵýdyń bir joly: Qazir Almatyǵa barý úshin Qaraǵandyǵa deiin bilet tapsańyz, ári qarai barý úshin Qaraǵandyda sol poiyzdyń ishinen basqa oryn tabýǵa bolady. Temirjol qyzmeti osyndai jańashyldyq engizdi. Bul jolaýshynyń dittegen jerine ýaqytyly jetýine múmkindik beredi.
