QR Parlamenti Senatynyń Tóraǵasy Máýlen Áshimbaev parlamenttik oppozitsiiaǵa kepildik beretin zańnamaǵa qatysty pikir bildirdi, dep habarlaidy QazAqparat.
«Prezident Ulttyq qoǵamdyq senim keńesiniń ekinshi otyrysynda birqatar saiasi reformalar usynǵanyn bilesizder. Búgin biz sonyń aiasynda ázirlengen mańyzdy eki zań jobasyn qabyldap otyrmyz. Soǵan sáikes, elimizde demokratiialyq úrdisterdi ary qarai damytý maqsatynda – qoldanystaǵy zańnamaǵa «parlamenttik kópshilik» jáne «parlamenttik oppozitsiia» uǵymdary kirgizilip otyr», - dep toqtaldy M. Áshimbaev Senattyń jalpy otyrysynda.
Osy oraida ol zańnamalyq normalar parlamenttik oppozitsiiaǵa kepildik beretinin atap ótti.
«Zańmen Májiliske sailanatyn parlamenttik oppozitsiianyń ókilettikteri jáne olardyń jumysyn qamtamasyz etý tetikteri naqty aiqyndaldy. Memleket basshysynyń usynysymen qabyldanǵan jańa zańnamalyq normalar elimizde parlamenttik oppozitsiiaǵa kepildik beredi, sondai-aq Qazaqstandaǵy kásibi parlamentarizmniń jańa kezeńine jol ashady dep senemiz», - dedi Senat Tóraǵasy.
Budan buryn habarlanǵandai, búgin Senatyń jalpy otyrysynda «QR Parlamenti jáne onyń depýtattarynyń mártebesi týraly» Konstitýtsiialyq zańyna tolyqtyrýlar engizý týraly» Konstitýtsiialyq zańy, sondai-aq «QR Parlamentiniń komitetteri men komissiialary týraly» Zańyna parlamenttik oppozitsiia máseleleri boiynsha ózgeris pen tolyqtyrýlar engizý týraly» Zańy qabyldandy.
