«Pedagog mártebesi týraly» jańa Zań boiynsha mektepke deiingi bilim mekemelerinde, qosymsha bilim beretin mekemelerde jáne kásibi-tehnikalyq bilim berý mekemelerinde jumys isteitin pedagogter úshin de sanatyna bailanysty biliktiligin arttyrý múmkindikteri qarastyrylǵan.
Sondai-aq pedagogikalyq mamandyǵy joq, biraq osy salada jumys istei alatyn qyzmetkerler úshin pedagogikalyq qaita daiarlaý kýrstary bar.
Bul týraly PrimeMinister.kz-ke QR Bilim jáne ǵylym vitse-ministri Sholpan Karinova aityp berdi.
Osy baǵytta búgingi kúni onyń tártipteri men erejelerin bekitý jumystary júrgizilip jatyr. Jalpy, qazaqstandyq pedagog mamandar keminde bes jylda bir ret biliktiligin arttyrýǵa quqyly.
«Jańa zań aiasynda pedagogtiń óz biliktiligin arttyrý maqsatynda qosymsha bilim berý baǵdarlamalary boiynsha biliktilikti arttyrý kýrstarynda bir ýaqytta jáne úzdiksiz, sondai-aq kezeń-kezeńmen oqi alady. Sondai-aq jekelegen baǵyttardy, sabaqtardy, pánderdi (modýlderdi) meńgere alady. Mysaly, aldymen pedagog ózi sabaq beretin pán boiynsha kýrstyq daiarlaýdan ótetin bolsa, kelesi joly tárbie jumysyna bailanysty, odan keiin jeke tulǵa retinde damý úshin psihologiialyq kýrstardan ótýi múmkin. Bul muǵalimniń búgingi qoǵamnyń talabyna sai jan-jaqty damýyna, pedagogikalyq sheberligin arttyrýǵa septigin tigizedi», - dedi Sh. Karinova.
Bul pedagogikalyq mamandyǵy joq, biraq osy salada jumys istei alatyn qyzmetkerler úshin qarastyrylǵan. Sondyqtan naqty pedagogikalyq bilimi joq mamandar bolatyn bolsa, olar tiisti deńgeidegi qaita daiarlaý kýrstarynan ótip, tiisti kredit sanyn alyp, odan keiin osy mamandyq boiynsha qyzmet etýine bolady.
Bilim jáne ǵylym vitse-ministriniń aitýynsha, Qazaqstanda pedagog mamandar tapshy.
«Biylǵy oqý jylynda bes myńǵa jýyq maman tapshy boldy, jańa oqý jylynda joǵary jáne kásibi tehnikalyq bilim mekemelerinen pedagog mamandyǵyn alyp shyqqan jas mamandar jumysqa tartyldy. Osy máseleni sheshýde qaita daiarlaý kýrstary mańyzdy ról atqarady», - dedi Sh. Karinova.
Sonymen qatar 2020 jyldyń naýryz aiynan bastap elimizdegi bilim berý uiymdarynda qyzmet etetin barlyq sanattaǵy muǵalimder attestattaýdan ótedi. Nátijesinde, olar biylǵy jańa oqý jylynda, iaǵni qyrkúiekten bastap ózderine tiisti ústemaqyny alatyn bolady.
Aita keteiik, osy ýaqytqa deiin tek mektepterde jumys isteitin muǵalimderge biliktilik sanatyna bailanysty 30%-dan 50%-ǵa deiin ústemaqy tólenip keldi.
«Bilim berý mekemeleriniń direktorlary men orynbasarlary úshin osyndai múmkindikter qarastyrylǵan. Qazirgi ýaqytta elimizde 7000-nan asa mektep, 827 kolledj jáne 10 myńnan asa mektepke deiingi mekeme men balabaqsha jumys isteidi. Olardyń basshylarynyń attestattaýdan ótip, jalaqylaryn 30%-dan 50%-ǵa deiin kóterýge múmkindikteri bar», - dedi bilim salasy basshylyǵynyń ókili.
Sh. Karinovanyń naqtylaýynsha, mektep basshysynyń da, orynbasarynyń da eńbekaqy kólemi bilim berý uiymyndaǵy bilim sapasynyń artýyna, oqýshylardyń tártibine, pedagogikalyq ujymnyń jetistikterine t.b. kriteriilerge bailanysty bolady.
