QR Ishki ister ministrligi múddeli memlekettik organdarmen birlesip, elge kelgen sheteldikterdi tirkeý tártibin jasady, dep habarlaidy "Ult aqparat".
«IIM elimizde 30 kúnge deiin bolatyn sheteldik azamattardyń barlyq sanaty úshin ýaqytsha tirkeýdi alyp tastaidy. Tiisti zańǵa Memleket basshysy Qasym-Jomart Toqaev qol qoidy.
«Qylmystyq, qylmystyq-protsesýaldyq zańnamalardy jetildirý jáne jeke tulǵalardyń quqyǵyn qorǵaýdy kúsheitý máseleleri boiynsha keibir zań aktilerine ózgerister men tolyqtyrýlar engizý týraly» zań BAQ-ta jariialanǵannan keiin 10 kúnnen soń kúshine enedi», - dep atap ótedi ministrlikten.
Vedomstvo málimetinshe, qabyldaýshy tarap kóshi-qon qyzmetin sheteldik qonaqtyń kelgeni jóninde ol elge kelgen kúnnen bastap 3 jumys kúni ishinde habardar etýi tiis. Búgingi kúni sheteldiktiń Qazaqstanda bolýy týraly habarlaý rásimi barynsha jeńildetilgen jáne kóshi-qon qyzmetiniń bólimderine barýdy talap etpeidi. Qabyldaýshy tarap vizalyq-kóshi-qon portalyna (www.vmp.gov.kz) kirip, sheteldik týraly jáne qajet bolǵan jaǵdaida onyń balalary týraly málimetterdi toltyrýy, toltyrylǵan ótinim nysanyna ETsQ kómegimen qol qoiýy, 15 minýttan keiin jeke kabinette saqtalatyn daiyn qujatty alýy qajet.
«Bul qyzmet tegin kórsetiledi jáne ony Ishki ister ministrligi 2014 jyldan bastap usynyp keledi. Biyl bul qyzmetti 250 qonaq úi paidalanyp, 110 000 sheteldiktiń bolǵany týraly málimet berdi. Sheteldik azamat Qazaqstan aýmaǵynda 30 táýlikten artyq bolǵan kezde qabyldaýshy tarap (qonaq úiler, hostelder, jalǵa beriletin páterler, emdeý-aldyn alý mekemeleri jáne basqa da zańdy jáne jeke tulǵalar) meimanǵa ýaqytsha bolýǵa ruqsat resimdeýge mindetti», - delingen ministrlik taratqan aqparatta.
