Úkimettiń kezekti otyrysy jańadan taǵaiyndalǵan ministrlerdiń ant berý rásiminen bastaldy, dep habarlaidy "Ult aqparat".
Úkimet basshysy Asqar Mamin jańa bilim jáne ǵylym ministri Ashat Aimaǵambetovti, ekologiia, geologiia jáne tabiǵat resýrstary ministri Maǵzum Myrzaǵalievti, mádeniet jáne sport ministri Aqtoty Raiymqulovany jáne saýda jáne integratsiia ministri Baqyt Sultanovty quttyqtap, jumystaryna tabys tiledi.
Osydan keiin Aimaǵambetov, Myrzaǵaliev jáne Raiymqulova oń qolyn Konstitýtsiiaǵa qoiyp, qazaq tilinde ant berdi.
"Qazaqstan Respýblikasynyń halqy men prezidenti aldynda, óz Otanym – Qazaqstan Respýblikasynyń ekonomikalyq jáne rýhani damý isine barlyq kúsh-jigerim men bilimimdi jumsaýǵa, memlekettiń Konstitýtsiiasy men zańdaryn qatań saqtaýǵa, ózimniń barlyq is-áreketimde zańdylyq pen ádilettik, azamattyq, ultaralyq, konfessiiaaralyq tatýlyq printsipterin ustanýǵa, Qazaqstan halqyna adal qyzmet etýge, óz elimniń memlekettiligi men dúniejúzilik qaýymdastyqtaǵy bedelin nyǵaita berýge saltanatty túrde ant etemin", - dedi olar.
Aita ketsek, Qazaqstan Prezidenti Jarlyǵymen Kúlásh Shámshidinova basqa jumysqa aýysýyna bailanysty qyzmetinen bosap, onyń ornyna Bilim jáne ǵylym ministri bolyp Ashat Aimaǵambetov taǵaiyndalǵan bolatyn. Ol buǵan deiin de bilim ministrliginde qyzmet etti. Al burynǵy Mádeniet jáne sport ministri Arystanbek Muhamediulynyń ornyna orynbasary Aqtoty Raiymqulova keldi.
Toqaevtyń Jarlyǵymen eki ministrlik quryldy. Saýda jáne integratsiia ministrligin Nur-Sultan qalasynyń eks-ákimi, burynǵy qarjy ministri Baqyt Sultanov, al ekologiia, geologiia jáne tabiǵat resýrstary ministrligin burynǵy energetika vitse-ministri Maǵzum Myrzaǵaliev basqardy.
