Búgin elimizde QR Parlamenti Senatynyń sailaýy aiaqtaldy. Nátijesinde jańadan 16 senator sailandy. Sailaý zańnama talaptaryna sáikes ótkizildi. Aryz-shaǵymdar túsken joq. 5 oblys ákiminiń orynbasary senator bolyp sailandy. Bul týraly búgin QR Ortalyq sailaý komissiiasynyń hatshysy Baqyt Meldeshov málim etti, dep habarlaidy "Ult aqparat" .
«Astana ýaqytymen 13-00-de jaǵdai boiynsha 16 óńirde QR Parlamenti Senatynyń depýtattaryna kandidattardy sailaýda daýys berýdiń aldyn ala qorytyndylary shyǵaryldy. Aldyn ala qorytyndy boiynsha Aqmola oblysynan Dáýren Ádilbekov, Aqtóbe oblysynan Muhtar Jumaǵaziev, Almaty oblysynan Nurlan Qylyshbaev, Atyraý oblysynan Ǵumar Dúisembaev, Shyǵys Qazaqstan oblysynan Dúisenǵazy Mýsin, Jambyl oblysynan Abdaly Nuraliev, Batys Qazaqstan oblysynan Nariman Tóreǵaliev, Qaraǵandy oblysynan Rysqali Ábdikerov, Qyzylorda oblysynan Murat Baqtiiaruly, Qostanai oblysynan Jeńis Nurǵaliev, Mańǵystaý oblysynan Baqtybai Shelpekov, Pavlodar oblysynan Nurjan Nursipatov, Soltústik Qazaqstan oblysynan Erik Sultanov, Ońtústik Qazaqstan oblysynan Álimjan Qurtaev, Astana qalasynan Edil Mamytbekov jáne Almaty qalasynan Dinar Núketaeva senator bolyp sailandy», - dedi ol.
Sóz sońynda OSK hatshysy sailaýdyń zań talaptary boiynsha ótkendigin atap ótti.
«Sailaýǵa 3291 tańdaýshynyń 3165-i qatysty. Ol – 96,2%-dy quraidy. Sailaý naýqanyna qatysqan halyqaralyq baiqaýshylardyń sany 172, sheteldik BAQ ókilderiniń sany – 116. Barlyǵy 288 baiqaýshy. Sailaý naýqany QR Sailaý týraly zańnama talaptaryna sáikes ótkizildi. Aryz-shaǵymdar osy ýaqytta deiin Ortalyq Sailaý komissiiasyna túsken joq», - dep túiindedi sózin Baqyt Meldeshov.
Al QR Ortalyq sailaý komissiiasynyń múshesi Konstantin Petrov óz kezeginde eń joǵary daýys jinaǵan kandidattardyń qandai qyzmet atqaratyndyqtaryn aityp berdi.
«Eń kóp daýys jinaǵan kandidattardyń arasynda is basyndaǵy 4 senator, 2 oblys ákiminiń birinshi orynbasary, 3 oblys ákiminiń orynbasary, bir oblys ortalyǵynyń ákimi, 1 oblystyq máslihattyń hatshysy, bir joǵary oqý ornynyń rektory, saiasi partiialardyń 2 ókili, 1 jeke sektor ókili jáne 1 arnaiy memlekettik organnyń ókili bar», - dedi Petrov.
