Ádilet ministri Qanat Mýsin jańa partiialardy tirkeý jaǵynan eshqandai qiyndyq bolmaitynyn málimdedi, dep habarlaidy Sputnik Qazaqstan.
"Qazaqstanda partiialar týraly naqty ári túsinikti zań bar. Oǵan sáikes, saiasi birlestikti tirkeý úshin kóp qujattyń qajeti joq. Eki-aq kezeńnen ótý kerek. Aldymen Ádilet ministrligine partiiany qurý týraly jazbasha habarlama beriledi. Sondaǵy barlyq málimet, jinalǵan qoldardyń sany da muqiiat tekseriledi. Áitpese, tizimge o dúnielik bolyp ketken adamdardyń kirip ketý jaǵdailary az emes", - dedi Mýsin jýrnalistermen bolǵan kezdesýde.
Barlyq málimet durys bolǵan jaǵdaida ministrlik resmi habarlamany resmi túrde rastap, tiisti qujatyn beredi. Sonyń negizinde saiasi uiymdy tirkeý sharalary bastalady. Filialdardy uiymdastyryp, múshe adamdardyń qajetti sanyn jinaýǵa bolady.
"Al múshelerdiń tiisti sany jinalyp, filialdar qurylsa, marhabat, tirkelýge ruqsat bar. Biraq barlyq talap oryndalýy shart. Biz eshkimge kedergi jasamaimyz", - dep atap ótti Mýsin.
Osy oraida jýrnalister Qazaqstanda kóp jyl boiy birde-bir partiianyń tirkelmegenin eske saldy. Ministrdiń aitýynsha, kóp nárse saiasi birlestikterdi uiymdastyratyn adamdardyń ózderine bailanysty.
"Joq jerden syltaý izdemeisiń ǵoi. Alaida naqty sebep bolsa, keshirińiz, bul – zań, al zań oryndalýy qajet", - deidi ministr.
Aita keteri, Qazaqstanda zań boiynsha saiasi partiiany tirkeý úshin 20 myń qol jinaý kerek. Budan bólek, eldiń árbir aimaǵynda filialdar ashylýy shart. Al oppozitsiia ondai talaptardy oryndaý ońai emes dep otyr. Sońǵy on jyldyń ishinde Qazaqstanda birde-bir jańa saiasi partiia tirkelgen joq.
Buǵan deiin tirkelmegen "El Tiregi" partiiasynyń jetekshisi Nurjan Áltaev Ádilet ministrliginiń san alýan syltaýmen 16 ret ótinishti keri qaitarǵanyn aitqan. Al qoǵam belsendisi Sanjar Boqaev "Namys" atty tsifrlyq partiianyń qurylatynyn málimdedi.
Qazirgi kezde Qazaqstanda 6 partiia resmi túrde tirkelgen. Olardyń úsheýi Parlamentke ótti.
