Foto: baq.kz
Qazirgi tańda elimizde 8 myńan asa mektepte 4,1 million oqýshy bilim alýda. Biyl 341 myń búldirshin 1-synypqa qabyldanady. 11-shi – bitirýshi synypqa 232 myń oqýshy ótti, dep habarlaidy Ult.kz.
Oqý-aǵartý ministri Ǵ. Beisembaevtyń sózinshe jańa oqý jylynyń ereksheligi – orta bilim berý júiesine jasandy intellekt engiziletin bolady. Ol úshin «Tsifrlyq saýattylyq» jáne «Informatika» pánderine jasandy intellekt integratsiialandy, etikalyq standarttary bekitildi. 1-11-synyp oqýshylaryna arnalǵan Dei-of-ei-ai («Day of Al») onlain kýrstary jáne pedagogterge arnalǵan kýrstar ázirlendi.
"Sondai-aq, jańa oqý jylynan bastap, Memleket basshysynyń tapsyrmasyna sáikes, «Keleshek mektepteri» modelin basqarý júiesi iske qosylady. Osy maqsatta «Keleshek mektepterin» basqarýdyń jáne akkreditteýdiń standarttary ázirlendi, onda úsh deńgeili kýrstardan ótken 3 myńnan astam pedagog jańa oqý jylynda jańasha jumys bastaityn bolady", - dedi ministr.
Ministrdiń esebi boiynsha qazirgi tańda 267 myń orynǵa arnalǵan 232 mektep salynýda. 1 qyrkúiekte 115 myń oqýshyǵa arnalǵan 83 jańa mektep ashylady. Jyl sońyna deiin 140 myń orynǵa arnalǵan 111 mekteptiń qurylysy aiaqtalady. Sondai-aq, biyl 190 myń oqýshy oqityn 245 mektepti jańartý jumystary júrgizilýde, onyń 145-i – aýyl, 100-i – qala mektebi. 1 qyrkúiekte 99 myń oqýshyǵa arnalǵan 127 mektepte renovatsiia aiaqtalady.
"Bul jumystardy ýaqytyly ári sapaly júrgizý ákimdikterdiń jaýapkershiliginde. Qazirgi ýaqytta Almaty, Atyraý jáne Abai oblystarynda jumystardy kúsheitýdi qajet etedi", - deidi Beisembaev.
Aýyl mektepteri
2025 jyly 69 myńnan astam oqýshy bilim alatyn 1 myń aýyl mektebin modernizatsiialaý josparlanǵan. Qazirgi tańda bul jospar 733 mektepte nemese 73,3%-ǵa oryndaldy. Almaty, Jambyl, Mańǵystaý, Túrkistan, Batys Qazaqstan jáne Shyǵys Qazaqstan oblystarynda modernizatsiialaý josparynyń tolyq oryndalmaý táýekelderi bar.
Sonymen qatar, biyl 680 mektepke 1 100-ge jýyq pándik kabinet satyp alý josparlanýda. Qazir 853 mektepte pándik kabinet satyp alynyp, jospardyń 77,5%-y oryndaldy.
"Almaty, Jambyl, Túrkistan, Batys Qazaqstan oblystarynda sondai-aq Astana, Almaty qalalarynda pándik kabinetterdi satyp alý josparynyń tolyq oryndalmaý táýekeli baiqalady. Ákimdikterden tiisti qarajat bólip, mejelengen josparlardy jyl sońyna deiin tolyq oryndaýdy suraimyz", - deidi Oqý-aǵartý ministri Ǵ. Beisembaev seisenbide ótken Úkimet otyrysynda.
