Respýblikada 7500 mektep jumys isteidi jáne daladaǵy dárethana máselesi 50 mektepte bar. Bul týraly QR Bilim jáne ǵylym ministri Ashat Aimaǵambetov málimdedi, dep habarlaidy QazAqparat.
«Eki jyl buryn eldegi 2700 mekteptiń dárethanasy dalada ornalasqan edi. Jalpy mektepterimizdiń sany 7500 ekenin eskersek, bul óte úlken paiyz.
Eki jylda kúrdeli jumystar júrgizildi, qazirgi ýaqytta 50-ge jýyq kóshe dárethanalary qaldy. Bul úlken progress. Degenmen, bul óte qiyn jumys, óitkeni sol 2700 mekteptiń kópshiliginde káriz de, sýmen jabdyqtaý da bolǵan joq. Ásirese bul ortalyqtandyrylǵan kárizi joq, sýy joq aýyldyq eldi mekender edi», - dedi Ashat Aimaǵambetov Senat otyrysynan keiin tilshilerge bergen suhbatynda.
Ministrdiń aitýynsha, kelesi oqý jyly bastalǵansha ákimdikter 50 mekteptegi dárethana máselesin tolyq sheshýge bekinip otyr.
«Jumys istep turǵan sanitarlyq toraptarda da buzýshylyqtardyń eki túri kezdesedi: birinshisi – biz júrgizgen tekserýler dárethanalar bar ýaqytta jumys istemeitinin kórsetedi. Sondyqtan sanitarlyq qyzmetter olarǵa qatty aiyppul salady. Ekinshi másele – qala mektepterindegi sanitarlyq toraptardyń jaǵdaiy», - dep atap ótti ministr.
Aimaǵambetov mektep dárethanalarynyń jai-kúii týraly habarlaýǵa bolatyn «jedel jelini» iske qosatynyn aitty.
«Balalardyń quqyqtaryn qorǵaý komiteti de úkimettik emes uiymdarmen birge senim telefonyn iske qosady, bul Whatsapp jáne Telegram kanalynda bolady, óitkeni balalarǵa osylai yńǵaily. Bul kóptegen adamdar aqparat jibere alatyndai kraýdsorsing siiaqty jasalady. Oǵan balalar, ata-analar jáne muǵalimder fotosýretti jibere alady. Tiisinshe, sanitarlyq-epidemiologiialyq qyzmetter men bizdiń komitet osyndai buzýshylyqtar bolǵan jaǵdaida baqylaý jasaidy», - dedi ol.
