Jańa Qazaqstanda jasandylyqqa jol berilmeidi. Bul týraly Májilis tóraǵasy Erlan Qoshanov aitty, dep habarlaidy QazAqparat.
Búgin palatanyń jalpy otyrysynan keiin tilshiler Qoshanovtan Jańa Qazaqstanda qandai ózgerister bolatynyn surady.
«Jańa Qazaqstanda ashyqtyqty kórip otyrsyzdar, jasandylyqtan ketip jatyrmyz. Jańa Qazaqstan bir kúnde ǵana quryla salmaidy ǵoi», - dep toqtaldy Májilis tóraǵasy.
«Ózderińiz de ózgerýlerińiz kerek. Sondyqtan ár adam ózine osy suraqty qoiǵany durys. Jalpy qoǵamnyń ózgergeni mańyzdy», - dedi Erlan Qoshanov.
Budan buryn habarlanǵandai, Májilis tóraǵasy ótken referendým Jańa Qazaqstanǵa jol ashqanyn aitqan edi.
«Birligi bekem el ekenin kúlli álemge pash etip, bolashaqqa nyq senimmen qadam basty. Birlik pen senim – «Jańa Qazaqstannyń» negizgi tiregi. Halqymyzda erteńge degen senim bar, aýyzbirlik bar, tatýlyq pen turaqtylyq bar. Endigi kezekte, Prezidentimizdiń mańaiyna toptasyp, osy senim men yntymaqty eselei túsýge tiispiz. Alǵa qoiǵan biik maqsattardyń bárine birge qol jetkizýimiz kerek. Referendým – «Jańa Qazaqstanǵa» jol ashty. Ony halqymyz jaqsy qabyldaǵanyn kórdik. Halyqaralyq jáne otandyq sarapshylar da naýqannyń ádil ári ashyq ótkenin aityp, jaqsy pikir bildirip jatyr. Bul – úlken istiń basy ǵana. Alymyzda budan da mańyzdy ári aýqymdy jumys kútip tur», - dedi ol.
