«Jańa Qazaqstan» modelinde Parlamentke kóp aýyrtpashylyq túsedi. Bul týraly búgin Senat janynan qurylǵan «Ulttyq múdde» dialog alańynyń birinshi otyrysynda Májilis depýtaty Saiasat Nurbek aitty, dep habarlaidy QazAqparat.
«Keshegi Joldaýdyń negizgi usynystary – Parlamenttiń rólin kúsheitý, Prezidenttik modeldi sál ózgertý, máslihattardyń jáne sailaý zańnamasynyń ózgerisi. Konstitýttsiia boiynsha Parlamenttiń eki qyzmeti bar edi ǵoi. Zań shyǵarýshy jáne ókilettik róli. Zań shyǵarýshy qyzmetin osy ýaqytqa deiin atqaryp kelgenimen, ókilettik róli álsiz bolatyn. Sondyqtan osy qyzmetin qazir jandandyrý kerek. Osyǵan orai meniń birneshe usynysym bar. Birinshi, parlamentarizm mádenietin qaitarýǵa tiispiz. Qazirgi tańda Parlamenttiń álsiz tusy – onyń saraptamalyq, derbes, táýelsiz kúshi bolmaýy. Máselen, AQSh-tyń Kongresine qaraityn bolsaq, myqty saraptamalyq qyzmet ortalyǵy bar. 2014 jyly sony zerttegenbiz. Sondyqtan aqyryndap saraptamalyq zertteý ortalyǵyn qalyptastyrsa degen oidamyn», - dedi ol.
Májilis depýtaty ekinshi usynysy retinde Parlamentke Reseidegidei «sarapshy saǵaty» formatyn engizý kerektigin aitty. Oǵan myqty sarapshylardy tartý qajet.
«Prezident Joldaýynda málimdegendei, «Jańa Qazaqstan» modelinde Parlamentke kóp aýyrtpalyq túsedi. Parlament soǵan daiyn bolýy kerek. Ishki resýrstaryn rettep, qoǵamdyq palata ma, sondai dúnielerdi ashpai bolmaityn siiaqty», - dedi Saiasat Nurbek.
