«Jańa Qazaqstan» depýtattyq tobynyń 3 teń tóraǵasy bolýy múmkin. Bul týraly QR Parlamenti Májilisiniń depýtaty Aidos Sarym aitty, dep habarlaidy QazAqparat.
«Aldyńǵy kúni depýtattyq toptyń bastamashylary jinalyp, aqyldastyq. Onyń jarǵysyn qabyldadyq. Jarǵysynda ázirge úsh teń tóraǵa bolady dep kórsetilgen. Olar: Edil Jańbyrshin, Natalia Dementeva jáne men. Qazir topqa qosylýǵa kelip jatqan azamattar da joq emes. Qosymsha jalaqy tólenbeidi. Biraq Májilis tóralqasyna, biýrosyna bir adamymyzdy joldaýǵa múmkindik alamyz. Iaǵni, olarǵa turaqty qatysýǵa Májilistiń kúntártibine áser etýge, depýtattyq saýal joldaýǵa, ministrlerdi jeke shaqyrtýǵa, aimaqtarǵa shyǵýǵa múmkindigimiz bolady», - dedi ol elordada uiymdastyrǵan baspasóz máslihaty barysynda.
Sonymen qatar Májilis depýtaty ókinishke orai qoǵamyzda jurtqa sózin tyńdata alatyn tulǵalardyń azaiyp bara jatqandyǵyn basa aitty.
«Avtoritarizm degen negizi elge jaqsy emes ekendigin túsindik. Qazir bastalǵan úderisterdi, tazarýdy, arylýdy aiaǵyna deiin jetkizý kerek. Bul - úlken másele. Shynyn aitý kerek, aitqanǵa ǵana ońai. Adam retinde de, Májilis depýtaty retinde Prezidenttiń shyn nieti bar ekenine senemin. Prezidentke ońai emes. Prezidenttiń sońǵy qabyldaǵan sheshimderi – tarihi sheshimder. Iá, «batpandap kirgen nárse, mysqaldap shyǵady» degen qazaqtyń maqaly bar. Menińshe, ol - jalǵyz Prezidenttiń qolynan keletin sharýa emes. Búkil qoǵam bolyp aralasýymyz, qadaǵalaýymyz kerek. Ásirese, osy avtoritarizmge, monopolizatsiiaǵa, oligopoliiaǵa alyp kelgen máselelermen qoǵam retinde belsendi kúresýmiz qajet jáne olardyń qarsylyǵy bolatyndyǵyn da túsinýge tiispiz», - dedi Aidos Sarym.
