Jańa eńbek jáne halyqty áleýmettik qorǵaý ministri Madina Ábilqasymova burynǵy qyzmeti de áleýmettik salamen tyǵyz bailanysty bolǵanyn aitty, dep habarlaidy Sputnik Qazaqstan tilshisi.
Jýrnalister jańa qyzmetine eki-úsh kún buryn ǵana taǵaiyndalǵan ministrden búgingi otyrysqa muqiiat daiyndalyp kelýiniń syryn surady.
"Men ulttyq ekonomika ministrliginde adam kapitalyn damytý jáne áleýmettik damý máselelerimen ainalystym. Biz úilestirýshi organ retinde barlyq memlekettik baǵdarlamany, strategiialyq damý josparlaryn kelisetinbiz. Atap aitqanda, men úkimet jumysyndaǵy áleýmettik salaǵa jetekshilik ettim. 2030 jylǵa deiin Qazaqstannyń áleýmettik jańǵyrýy tujyrymdamasyn ázirleýge de tikelei qatystym. Sondai-aq ulttyq ekonomika ministrliginde ekonomikalyq yntymaqtastyq jáne damýdy uiymdastyrýǵa qatysty barlyq jumysty úilestirdim. Sol kezde bizge áleýmettik, kadr daiyndaý, eńbek resýrstaryn daiyndaý sapasy standarttaryn EYDU elderimen sáikestendirýge qatysty kóp usynys tústi. Bul bolashaqta Qazaqstannyń 30 damyǵan eldiń qataryna kirýi jolynda óte mańyzdy mindet dep sanaimyn. Osyǵan bailanysty men jańa jumysymda Qazaqstannyń ártúrli júiesine jetekshi halyqaralyq standarttardy engizýge basa den qoiǵym keledi. Menińshe, qazir bul óte ózekti másele", — dedi ministr.
Ábilqasymova buǵan deiin vedomstvony basqarǵan Tamara Dúisenova ózine tabys tilegenin aitty.
"Tamara Dúisenovamen sóilestim, qyzmetime zor tabys tiledi", — dedi ol.
