Ekologiia, geologiia jáne tabiǵi resýrstar ministri Maǵzum Myrzaǵaliev jańa Ekologiialyq kodekske sáikes, zańsyz aǵash keskenderge jaza qalai kúsheitilgenin aityp berdi, dep habarlaidy QazAqparat.
«Pandemiia ishki týrizmge suranysty arttyrdy. Biraq bul azamattardyń ekomádenietiniń tómendigin de kórsetkenin atap ótý kerek. Qazaqstanda tabiǵaty erekshe jer kóp. Tabiǵi parkter, qoryqtar deisiz be, týrister kelgennen keiin barlyq jerde qoqys jinalady. Árine bul tabiǵatqa keri áserin tigizbei qoimaidy. Oǵan qosa, keiingi kezde eldi mekenderde aǵashtar men butalardy zańsyz kesý, joiý jáne zaqymdaý faktileri tirkeldi», - dedi ministr búgin OKQ-da ótken baspasóz máslihatynda.
Onyń aitýynsha, Memleket basshysynyń tapsyrmasy boiynsha ministrlik múddeli memlekettik organdarmen birlesip osy tártip buzýshylyqtar úshin jazany kúsheitýge baǵyttalǵan birqatar shara qabyldaǵan.
«Sonyń nátijesinde Qyzyl kitapqa engen aǵashtardy zańsyz kesken, joiǵan, zaqymdaǵandarǵa 30 ese mólsherde kompensatsiialyq aǵash ektirý, sondai-aq jeke jáne zańdy tulǵalarǵa tiesili nysandardyń irgeles aýmaǵyndaǵy jasyl jelekti ekpelerdi joiǵany úshin 10 ese mólsherde aǵash ektirý kózdeledi. Bul normalar qaǵidalarda kózdelmegen edi. Odan bólek, orman zańnamasyn buzýdan kelgen ziiannyń mólsherin esepteý úshin bazalyq mólsherlemelerge ózgerister engizý boiynsha jumys júrgizildi. Qyzyl kitaptaǵy árbir zańsyz kesilgen aǵash úshin ziiandy óteý mólsheri 6 AEK-ten 1000 AKE-ke deiin ulǵaityldy. Budan basqa, Ákimshilik jáne Qylmystyq kodeksterge sanktsiialardy qatańdatý boiynsha ózgerister engizildi», - dedi ol.
