Qazaqstannyń 2 millionǵa jýyq turǵyny latyn grafikasyndaǵy álipbige negizdelgen tuńǵysh jalpyhalyqtyq diktantqa qatysty, dep habarlaidy QazAqparat tilshisi.
Olardyń arasynda belgili qoǵam qairatkerleri, aqyn-jazýshylar, ártister men sportshylar bar.
«Osylaisha, latyn qarpin birte-birte bastap, halyqqa keńinen taratý kerek. Óz basyma latyn qarpi qiyn emes, sebebi Qytaida qazaq tilin latyn qarpinde úirengen bolatynbyz. Degenmen, on shaqty áripte aiyrmashylyq bar. Solardy meńgersek, jańa nusqaǵa qinalmai kóshemiz. Keleshek urpaqqa bizdiń tarihymyzdy, muramyzdy bilý úshin latyn qarpine kóshýi óte oryndy. Búgingi diktanttan 4+ alatyn shyǵarmyn», - dedi belgili opera ánshisi, Qazaqstannyń eńbek sińirgen ártisi Maira Muhamedqyzy.
QR Mádeniet jáne sport ministri Arystanbek Muhamediuly diktantta 3-4 qate jibergenin aitty.
«Basynda jyldam jazýǵa tyrysyp, 3-4 qate jiberip aldym. Ásirese, i men i, y men ý áripterinen jańyldym. Jalpy ózim aǵylshyn tilin bilemin, sol úshin áripterdi jazý qiyn bolǵan joq. Smartfonda da latyn grafikasyn jii qoldanamyz. Búgindi diktantyma 5- degen baǵa beremin. Barlyq otandastarymdy latyn qarpine tezirek kóshýge shaqyramyn», - dedi ministr.
Sonymen birge, ministr «jańa álipbige ózgerister engizý qajet pe» degen jýrnalister suraǵyna jaýap berdi.
«Álipbige esh ózgeris kerek emes. Barlyǵy Ý men Y áripterin yńǵaisyz dep aitady. Oǵan da kele-kele úirenemiz. Dúniejúzinde naqty shyńyna jetken álipbi joq. Aǵylshyn, frantsýz, nemis álipbilerine qaraǵanda, bizdegi álipbi nusqasy óte yńǵaily. Osy baǵytymyz durys jáne ony aýystyrýdyń keregi joq», - dedi A. Muhamediuly.
Aita keteiik, jalpyhalyqtyq diktant bir ýaqytta óńirlerdegi tilderdi damytý basqarmalary daiyndaǵan arnaiy aýditoriialarda ótti. Diktanttyń taqyryby - «Rýhani jańǵyrý» baǵdarlamasy. Mátin 80-ge jýyq sózden turady. Diktant aiaqtalǵan soń, mátinniń jazbasha nusqasy emle.kz, tilalemi.kz saittarynda jariialanyp, ár qatysýshy jańa qazaq álipbiin meńgerý deńgeiin teksere alady.
